Corporate Social Responsibility – naalisarlugu CSR – tassaavoq qitiusumik ataatsimoorfigisaq suliffeqarfiit inuiaqatigiinni akisussaaqataasuunerannut tunngasoq. 

Aasianni, Sisimiuni, Paamiuni kiisalu Qaqortumi “Suliffeqarfiit atuarfinnut-atuarfiit suliffeqarfinnut” ingerlanneqarpoq. Sisimiuni ingerlanneqarmat Royal Greenlandip suliffeqarfissuarmi sulisoqarnermi ingerlatsisua Søren Olsen Damgaard suliniummut peqataavoq, taassumalu maluginiakkani ima oqaluttuaraa.

- Meeqqat Sisimiuni Minngortuunnguup atuarfiani atuartut isumaqarsimagaluarput Royal Greenland aalisartunuinnaq tunisassiorfinnilu sulisunuinnaq suliffissaasoq, saqqummiiviginerini erserpoq inuusuttut aatsaat paasileraat Royal Greenland suliffeqarfiusoq angisooq sorpassuarnik ilinniagalinnut suliffiusinnaasoq, Søren Olsen Damgaard oqarpoq.

Sunniuteqarnissaq anguniarneqarpoq

Suliniummi “Suliffeqarfiit atuarfinnut-atuarfiit suliffeqarfinnut” Royal Greenlandip peqataanera inuusuttuaqqanut meeqqat atuarfianni atuartunut sunniuteqarnissaa anguniarneqarpoq, atuartummi suliffeqarfeqarnermut tunngasunik ilisimasassaannik qaammarsaanerummat. Inuusuttuaqqat meeqqat atuarfianni naammassillutik soraarummiileraangamik ilaasa suli aalajangiunnagu ilisimanaguluunniit sumi ilinniaqqikkusunnerlutik imaluunniit siunissami sumi sulerusussanerlutik nalullugu soraarummeertarput, taamaammat suliniutip iluaqutitaqarnissaa qularutigineqanngilaq.

- Malunnarpoq inuusuttuaqqat suliffeqarfinnut tunngasunik paasisaqarnerulerlutillu ilisimasaqarnerulersut, tamanna Royal Greenlandimit isumalluarnartutut isigaarput tassami inuusuttuaqqat arlaqartut Royal Greenlandimut soqutiginnilersut malunnarmat. Taakkuussinnaalluarpullu siunissami ilinniartussavut imaluunniit sulisussavut, tamaasalu tikilluaqqoqaagut, Søren Olsen Damgaard oqarpoq.

Suliffeqarfissuarmi sulisoqarnermi ingerlatsisup aamma oqaatigaa suliniut Sisimiuni ingerlanneqarmat iluatsilluarsimasoq. Taammaammat pilersaarutigineqarpoq “Suliffeqarfiit artuarfinnut-atuarfiit suliffeqarfinnut” Sisimiuni atuartunut 8. klassinngorlaanut ingerlanneqaqqissasoq.

- Suliniutip siunertaa pitsaasuummat suliniutip ingerlanneqaqqinnissaanut Royal Greenland peqataaqqinnissaminut pilersaaruteqarpoq. Takusakka aallaavigalugit erserpoq atuartut amerlanerusut ilinniagaqaqqinnissaminnut soqutiginnilersut aammalu sulerusussuseqarnerat annertusisoq, Søren Olsen Damgaard oqarpoq.

Suliniutip ingerlanneqarnerani suliffeqarfiit assigiinngitsut peqataatinneqarput ilaatigut Brugseni. Suliniullu meeqqat atuarfianni 8. klassenuinnaq ingerlanneqarpoq, siunissamilu nunatsinni Kommuneqarfiit tamaasa aamma ilanngunneqarnissaat pilersaarutigineqarpoq.

Allattoq: Marie Kuitse Kristensen, mkri@royalgreenland.com

Assit: CSR Greenland

Asseq

 
 

Royal Greenland aperiguk

i
Write the text from the image