- Uumatitsivinnut saarullinnik pilersuilluni iluarpoq. Aalisarneq pisariitsuaraavoq aningaasarsiornerpullu qaffangaatsiarpoq, Pavia Siegstad Royal Greenlandip Kangaatsiap eqqaani saarullinnik uumatitsiviinut pilersueqataasoq oqarpoq.

Saarulliit uumatitsivinni uumatiinnarneqartarput, sulilu uumatillugit aammalu sila apeqqutaatillugu umiarsuarmik uuumatitsiviutigisumik Maniitsup tunisassiorfianut nalunaaquttap akunnerisa 48-t missaasa ingerlanerini assartorneqartarput. Saarulliit nunatta avannaanut illikarnerat pissutigalugu Maniitsup Sisimiullu eqqaanni uumaitsivinnut saarullinnik pilersuineq ilimagisamit pitsaannginneruvoq. Kangaatsialli eqqaani aalisartut tulaassuisunnguupput.

Uumatitsiviit quliniit 47-nut

- Kangaatsiap eqqaani aallartilluangaaratta saarullinnik uumatitsivinnik ataavartumik pilersuiuarsimavugut. Tulaassuineq juulip aallaqqaatani aallartimmat uumatitsiviit qulit aallarniutigaavut, maannalu 47-nik peqalerpoq, taakkunannga 45-t atorneqarlutik. Kangaatsiami silarlorujussuarsimavoq taamaammallu maanna aalisartoqarani. Taamaakkaluartoq aalisartut tulaassuilluaqaat, uumatitsiviillu ulikkaarneqapallattarput, Susanne Marie Olsen Royal Greenlandip Maniitsumi tunisassiorfiani ingerlatsisoq oqarpoq.

Aalisartut Kangaatsiameersut aammalu nunaqarfinnit Niaqornaarsummeersut, Iginniarfimmeersut, Ikerasaarsummeersut kiisalu Attumeersut Kangaatsiap eqqaani saarullinnik uumatitsivinnut ima tulaassuitigaat allaat Royal Greenlandip Kangaatsiami tunisassiorfiata qerisuutaanik assartuisoqarsinnaannginnera pissutigalugu matoqqanera eqqarsaatersuutigineqartaraniluunniit.

- Tunitsivik tunitsivigisarallaratsigu imaarneqartussanngorluni matoqqagaangat ajornartorsiutigerujussuartarparput, massakkulli aalisarluangaaratta amerlanerilluunniit matoqqanera eqqarsaatigigunanngilaat, Pavia Siegstad oqarpoq.

Aalisarneq aallartimmat aalisartut tulaassueriaaseq nutaaq sungiunniaqqaarsimavaat.

- Kangaatsiap eqqaani aalisagaqaalummat aalisartut uumatitsiviit ulikkaapallassinnaasarpaat. Aallaqqaammut uumatitsiviit ulikkaarpallaarneqartannginnissaat ajornartorsiutigilaarparput. Aalisartummi ilaatigut aalisakkat pitsaassusaat ajortinnginniassammata uumatitsiviit 20 tonsit missiliuinnarlugit immertarnissaat ilikkartariaqarsimavaat. Maniitsumi tunisassiorfimmi ulappussimaqaagut, maannali takussavarput aalisarluarneq taama ingerlaannassanersoq, tassami ilaatigut sila pissutigalugu nalunaartut killilerujussuupput aavarnerlu aallartereerluni aammalu saarulliit maanna itisoorsuarmiillutik, Susanne Marie Olsen oqarpoq.

Susanne Marie Olsen ilisimatitsivoq saarulliit Kangaatsiap eqqaaneersut angisuujusut aammalu niaquikkatut tisariikkatullu agguaqatigiissillugu 1200 gramip missaanik oqimaassuseqartut, massa Maniitsup Sisimiullu eqqaaneersut 900 gramip missaaniittut. Assersuutigalugu Kangaatsiap eqqaaniit assartuinermi ataatsimi 80 tonsit missaanniittut tulaassatut assartorneqartarput, massa Sisimiut eqqaannit assartuinermi ataatsimi 30 tonsiusartut aammalu Maniitsup eqqaanit assartuinermi ataatsimi 75 tonsit missaannittartut. Sisimiut eqqaanni saarullinnik uumatitsivinnut tulassuineq aalisarnerliortoqarnera pissutigalugu unitsinneqarpoq.

- Umiarsuaq uumatitsivik ataasiinnaq atorlugu saarullinnik uumasunik Maniitsumut assartuisoqartarnera amigarujussuarpoq. Umiarsuit uumatitsiviit assartuisut marluusinnaagaluarpata sukkanerusumik pilersuisinnaagaluarpugut, Pavia Siegstad oqarpoq.

Allattoq: Káte Hansen, kaha@royalgreenland.com

Assit: Pavia Siegstad

Asseq

 
 

Royal Greenland aperiguk

i
Write the text from the image