Suliniummik suli pilersaarusiorneqaleruttortumik tamakkiisumik isiginninneq tunngavigalugu ingerlatsinermi Royal Greenlandip nungusaataanngitsumik aalisarneq pillugu tunngavii; inuit, nunarsuaq aamma sinneqartoorneq naapertorlugit pingaartitanut atatillugu pitsanngorsaaneq ukkatarineqassaaq. Suliniummik”Nungusaataanngitsumik aalisarneq pillugu suliniut – Qaleralinniarfiusartumik ukkassineq”-mik ingerlatsineq niuernermik aallussineq aamma Naalagaaffiit Peqatigiit piujuartitsineq pillugu anguniagai tunngavigalugit misileraanernik inerisaanernillu ilaqassaaq. Aalisarnerup nungusaataanngitsumik ingerlanneqarnissaanik, tunisassianik qaffasissumik tunisisoqartarnissaanik, aalisartut sulisullu sulinermi atugaannik pitsanngorsaasoqarnissaanik qulakkeerinninnikkut taamatuttaaq aalisarfiusup pineqartup aamma Royal Greenlandip iluanaarutigisartagaasa amerlanerulernissaat siunertaralugu najukkami toqqakkami innuttaasut aningaasaqarnikkut inissisimanerat kulturikkullu pingaartitaat pitsanngorsarneqarnissaat anguniarneqarpoq. Royal Greenlandimi pisortaanerup Mikael Thinghuusip “Kalaallit Nunaat nunarsuarmilu anguniakkat”-mik qulequtserlugu isummersoqatigiinnermi - CSR Greenlandimit Katuami sisamanngormat ingerlanneqartumi - oqalugiarnermini tamanna ilisimatitsissutigaa.

- Sinerissap qanittuani nungusaataanngitsumik qaleralinniartoqartalernissaata anguneqarnissaa tunngaviusumik kissaatigaarput. Siunissaq ungasinnerusoq eqqarsaatigalugu sinerissap qanittuani qaleralinniartarfiusumi tamarmi ilaannaaniluunniit qaleralittat MSC-mit akuerisaappata pitsaanerpaassaaq. Ilisimatitsissutigineqareersutut maanna qaleralittarineqartartut ukiut tallimat qulillu matuma siorna qaleralittarineqartartunut sanilliullugit mikinerungaatsiarmata sinerissap qanittuani - ingammik Qeqertarsuup Tunuata imartaani - qaleralinniarneq ajoraluartumik kipiluttunartorujussuarmik ingerlavoq. Tamatuma qaleralinniarfiusartuni allani atuutilernissaa pinaveersaartikkusupparput. Taamaammaat nungusaataanngitsumik qaleralinniartoqartalernissaa tamatumalu kingunerisaanik sinerissap qanittuani qaleralittat MSC-mit neriuginartumik ukiut marluk-pingsut-sisamat qaangiuppata akuerisaasimanissaat qulakkeerumallugit aalisarnerup tungaatigut aqutsinermi sutigut pitsanngorsaasoqassanersoq najukkani assigiinngitsuni aalisartut, Pinngortitaleriffik KNAPK-lu suleqatigalugit paasiniassavarput, Royal Greenlandimi pisortaaneq Mikael Thinghuus oqarpoq.

MSC-imit akuerisaasimanissaat piumasaqaataavoq

Mikael Thinghuusip oqaatigaa, nunat killiit aalisakkanik tunisassiat MSC-imit akuerisaasimanissaat piumasaqaatigisaraat, pisisartullu kangiani niuerfinneersut assinganik piumasaqaateqartartut amerligaluttuinnartut.

- Taamaattumik qalerallit tunisassiarisartakkavut MSC-mit akuerisaanngippata akii piffissap ingerlanerani appassapput tuniuminaassissallutilluunniit. Nunarsuarmilu qaleralinniarnerit MSC-mit akuerisat ikittuararsuummata sinerissallu qanittuani qaleralittat tunisassiarisartakkavut MSC-mit akuerisaanissaat angusinnaagutsigu unammilleqatigiinnerup tungaatigut inissisimallualerlutalu qaleralinnik tunisassiavut akigissaarnerutillugit tunisinnaavagut. Tassa imaappoq, naammattunik sulisussaqalertuugutta qalerallinnillu angisuunik pissarsisalertuugutta qalerallit nerpiinik ataasiakkaarlugit qerinasuartitanik sinerissallu qanittuani qaleralittanik MSC-mit akuerisanik tunisassiavut tunisinnaanngussavagut. Tamanna angugutsigu naammagisimaarnarluinnassaaq, Mikael Thinghuus oqarpoq.

Suliniut ”Nungusaataanngitsumik aalisarneq pillugu suliniut – Qaleralinniarfiusartumik ukkassineq” aalisarfimmut sorlermut attuumassuteqartillugu ingerlanneqassanersoq suli aalajangerneqanngilaq, ilimanarporli Uummannamut Upernavimmulluunniit attuumassuteqartillugu ingerlanneqassasoq.

MSC-imit akuersissummik pinissamut suliniuteqarneq aalisarfimmi toqqakkami qaleralittat MSC-mit tamakkiisumik akuerisaanerannik kinguneqarsinnaappat aalisarfimmi allami qaleralittat MSC-mit aamma akuerisaasinnaasut Royal Greenlandimi CSR pillugu immikkoortortamit aamma Royal Greenlandip suliffeqarfissuarmi avatangiisilerinermi ingerlatsisuanit Lisbeth Due Schönemann-Paulimit – suliniummik pineqartumik ingerlatsinermi aqutsisuusumit – ilisimatitsissutigineqarpoq. MSC-ip suliniutaa – aalisarnermik aqutsineq pillugu pitsanngorsaanermut suliniummik – Sustainable Fisheries Greenland (SFG) – susassareqatigiit MSC-imik ilisarnaaqqusiinermut nungusaataanngitsumillu aalisarnermut tunngasunik aallutaqartuusut kattuffiannit ingerlanneqartumik - tassa Fishery Improvement projectimik (FIP) taallugu – aallartinneqassaaq.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image