Royal Greenland ukiuni kingullerni ingerlatsinermini angusani tunngavigalugit nunami tunisassiorfiutini tunitsiviutinilu nutarterneqarnissaannut aningaasaliissuteqaqqillunilu nutaanik aningaasaliissuteqarpoq. Aningaasaliissuteqartarnera pissutigalugu tunisassiornermik inerisaanerulertoqarsinnaanngorlunilu suliffissaqartitsinerulertoqarsinnaanngorpoq.

- Taamaammat ulapaarfimmi suliartortitatta affaasa missaat najugarinngisaanni suliffissaqartitavut periarfissatsialammik atorluaannginnerat suliffigisaminnillu sumiginnaanerat tunisassiorfinni arlalinni ingerlatsinerup tungaatigut ajalusoorujussuartoqarneranik kinguneqartitsimmata ajuusaarnartupilussuuvoq. Tamanna Royal Greenlandip ingerlatsineranut tunisassiorneranullu pitsaanngitsumik sunniuteqarpoq, Søren Olsen Damgaard oqarpoq.

Sulisoqarnermi siunnersortaanerup ilisimatitsissutigaa, ulapaarfimmi suliartortitat angerlarlutik aallartut ataatsimut isigalugit Kalaallit Nunaanni sumiiffinnit assigiinngitsuninngaanneersuusut.

- Ulapaarfimmi suliartortitat amerlasuut sulinermik sungiussisimanngitsuusut erserpoq. Arlallit sivisuumik suliffeqanngitsuusimakkajuttuupput. Ilai angerlarsertarput allallu imigassamik assigisaannilluunniit atornerluinermik ajornartorsiuteqarput, Søren Olsen Damgaard oqarpoq.

Aaqqissuussinerujussuartaqarpoq

Royal Greenlandimi sulisoqarnermut immikkoortortami sulisut ulapaarfimmi sulisussanik sulisussarsiorlutik ukiakkut aallartikkaangata suliaat aaqqissuussinerujussuarnik ilaqartarmata suliaat annertoorujussuusarput. Sulisussarsiornerit tunisassiorfiit ataasiakkaat, najukkani kommunini suliffissarsiuussisarfiit sulisoqarnermullu immikkoortortami sulisut suleqatigiinnerisigut pisarput, tamatumanilu ulapaarfimmi sulisussanik nunatsinneersunik aammalumi nunanit allaneersunik sulisussarsiortarput, ulapaarfimmi sulisussanut tamanut inissarsiuussisarput taakkulu angalanissaannik aaqqissuisuusarlutik.

2018-imi ulapaarfimmi sulisut nunatsinneersut katillugit 100-ngajaapput, Kinameersut 18-iupput, Filippinerineersut qulingiluaapput Nordjobbimeersullu 24-iullutik.

- Suliartortitat affaasa missaat naak angerlarlutik aallaraluartut suliartortitat nunanit kangilliineersut sulisullu aalajangersimasut aalajaatsut nunatsinneersullu aalisartut aalisagartaminnik qalerualittaminnillu ataavartumik tunisisarnerminnik attassiinnarsinnaasimanerannut qularnanngitsumik iluaqutaapput.

Ulapaarfimmi sulisut nunatsinneersut - tunisassiorfinnut tunitsivinnullu sulisussaaleqisoqarfiusunut suliartortitaasimasut - amerlasuut illoqarfiit nunaqarfiillu qanittuaneersuupput. Ulapaarfimmi suliartortitat nunatsinneersut sivikinnerpaamik qaammatini pingasuni sulisussanngortinneqarlutik sulilersinneqartarmata angalanerannut aningaasartuutit Namminersorlutik Oqartussat nuttarnerulersitsiniarluni ikiorsiissutaannik akilerneqartarput. Suliartornerminniilli qaammatit pingasut suli qaangiutinngitsut suliunnaaraangamik angerlarlutik angalanertik namminneq akilertarpaat.

Ulapaarfimmi sulisut nunatsinneersut aammalumi nunanit allaneersut Royal Greenlandip Kalaallit Nunaanni tunisassiorfiinut suliartortitaasimasut tamarmik assigiimmik akissarsiaqartinneqarlutillu aningaasat inigisaminnut akiliutigisartagaat annertoqatigiipput. Nordjobbimeersut nunatsinnut kajumissutsiminnik suliartortut nunatsinnut angalanertik namminneq akilertarpaat, sivikinnerpaamilli qaammatini marlunniit pingasuni sulisimagaangata utimut angalaneri Royal Greenlandimit akilerneqartarput. Suliartortitat allat nunanit allaneersut nunatsinnut nunaminnullu angalaneri Royal Greenlandimit akilerneqartarput, amerlanerpaartaalu atsiornikkut isumaqatigiissutit inuttaannut atuuttut naapertorlugit sivikinnerpaamik ukiumi ataatsimi sulisarput.

Sulisoqarnermi siunnersortaanerup ilisimatitsissutigaa, ulapaarfimmi sulisussanik aalajaatsunik sulisussarsiorneq pisariusorujussuusarmat Royal Greenland ulapaarfimmi sulisussanik ukioq manna suliartortitsinavianngitsoq.

Allattoq assiliisorlu: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image