Royal Greenlandimi sulisuusut inuusuttut taakku marluk ilinniarnerminni maannalu Royal Greenlandimi suliffimminni sulinertik pillugu Ilisimatusarfimmi ilinniagaqartut Royal Greenlandimi suliffissarsiorlutik qinnuteqaateqarnissaannik kajumissaarniarlugit saqqummiussipput.

Sulisoqarnermut immikkoortortami siunnersortip Line Poulsenip, inuusuttut saqummiussisussat ilisaritereermagit Mikkel Krog Søndergård Ilisimatusarfimmi inuiaqatigiilerinermut tunngasunik ilinniagaqareernermi kingorna nunat assigiinngitsut pillugit Århusimi Universitetimi ilisimatusareerluni Royal Greenlandimi kilisaateqarfimmi nalunaarsuinermi ilitsersuisutut sulinini oqaluttuaraa.

Nunani allani saqqumilaartuunera kajungilersitsivoq

- Nunani assigiinngitsuni pissutsinut tunngasunik Århusip Universititiani ilisimatusarnerma nalaani Royal Greenlandimi CSR pillugu immikkoortortami ikiortitut sulivunga. Ilinniakkannik naammaasinnereernerma kingorna Royal Greenlandip tunisasiorfiini nunani allaneersunik sulisussarsiornerani suleqataavunga, kingornalu kilisaateqarfimmi nalunaarsuinermi ilitsersuisutut atorfinillunga. Maanna suliakka ilinniakkamalu imarisai imminnut attuumassuteqanngitsutut nalilerneqarsinnaagaluarput, kisiannili Royal Greenland suliffeqarfiuvoq angisooq nunani assigiinngitsuni attuumassuteqarluni suliaqartoq. Tassalu nunani allani aallutaqarluni Royal Greenlandip suliaqarnera uanga tassani sulinissannut kajungilersitsivoq. Neriuutigaara akisussaaffimmik angisuumik inuiaqatigiinnut sunniuteqarluartumik siunissami suliaqalerumaarlunga, Mikkel Krogh Søndergård oqarpoq, nangillunilu:

- Maani suliffeqarfinnik nittarsaassinermi peqataanitsigut, inuussutissarsiutinut aalisarnermut sammiveqartunut ingammik arnat soqutiginnilerumaartut neriuutigaara. Arnammi inuussitiisarsiutini aalisarnermut sammiveqartuni amigaataalluinnarmata aamma Royal Greenlandimi suliassaqarfinni amerlasuuni ilinniarluarsimasut ukkatarineqarmata.

Suliffimmi qaffakkiartorsinnaaneq periarfissaavoq

Tina Hansen, Niernermik Ilinniarfimmi niuernermik tuniniaanermullu tunngasunik ilinniagaqarnermi nalaani Royal Greenlandip nunatsinni tuniniaaviani suliffimmik misiliilluni sulereerluni ilinniakkani naammassigamiuk Royal Greenlandimi sulisoqarnermut immikoortortaqarfimmi suliffimmik neqeroorfigitittoq oqarpoq suliffimmik misililluni sulinermini suliassat pissanganartut 2017-imi Royal Greenlandimi atorfittaarneranut aalajangiisuusut.

- Atorfimmi qaffakkiartorsinnaanermut periarfissat Royal Greenlandimi atuupput aamma ilinniaqqissinnaanermut periarfissaqarpoq. Atorfimmi qaffakkiartorsinnaaneq periarfissaammat uanga Royal Greenlandimi suliinnarnissara naatsorssutigaraa, Tina Hansen ulluinnarni sulisussarsiortarnernik allanillu pilersaarusiorlugit suliassanik ulluinnarni suliaqartoq oqarpoq.

- Qularinngiluinnarpara ukiut tallimat qaangiuppata suli Royal Greenlandimi sulissallunga tikilluaqqusaasutummi misigisimavunga aamma Royal Greenland sulifitsialaammat, Tina Hansen Ilisimatusarfimmi suliffeqarfinnik nittarsasssinermi saqqummiussigami oqarpoq.

Ilimatusarfimmi Nuummi suliffeqarfippassuit nittarsaassineranni suliffeqarfiit allat assigialugit Royal Greenland aamma ornigarneqarluartumik tuniniaaveqarpoq.

Ilisimatusarfimmi suliffeqarfiit nittarsaassineranni assit allaaserisap ataani takuneqarsinnaapput.

Allattoq: Inga Egede, ineg@royalgreenland.com

Assit: John David Eriksen

Asseq

 
 

Royal Greenland aperiguk

i
Write the text from the image