Raajat qalipallit, qalerallit saattuallu tungaatigut ineriartortoqarluarpoq, akerlianilli raajat uusut qalipaajakkallu tungaatigut qaammatini qulingiluani siullerni ilungersunartorsiorfiusimavoq.

Pingaartumik Kangiani Skandinaviamilu ineriartortoqarluarpoq, taamalu Royal Greenlandip tunisassiatigut niuerfinnilu aallussaasa patajaatsuunerannik aammalu naleqalersitsiartornikkut inissisimanerata immikkuullarissuuneranik takussutissiilluni.

Raajat qalipallit aalisarluarneqarnerisigut niuerfinnilu tuniniarluarneqarnerisigut siorna angusaqarluarnerpaaffiusimasoq qaangerneqarpoq, Royal Greenlandillu qaleralinnik nunarsuarmi tunisaqarnerpaatut inissisimaffini 5 procentinik qaffariaateqarfigaa aammalu Japanimi aningaasarsiorluarnini pitsanngoriaateqarfigilluarlugu.

- Iliuusissatut pilersaaruterput The North Atlantic Champion naapertorlugu Uummannami Aappilattumilu tunisassiorfinnik allisaanitsinni katillugit 70 millioner koruuninik aningaasaliissuteqarsimavugut, taamalu Royal Greenlandip tunisassiornikkut nakuunerulersinneratigut Kalaallit Nunaanni annertunerusumik nalitusaanerulernissatsinnut periarfissaqalissaagut. Aningaasaliissuteqarnerit Kalaallit Nunaanni sumiiffinni allani ingerlatissavagut taamalu Royal Greenlandip qaleralinnik nunarsuarmi tunisaqarnerpaatut inissisimanera suli patajaannerulersillugu, Mikael Thinghuus Royal Greenlandip pisortaanera oqarpoq.

Issittup saattuai Quin-Sea Fisheriesimit aallaavillit piumaneqarluarlutik akigissaarlutillu Japanimi aamma USA-mi niuerfiulluarnerpaani tunisaalluarnerisigut 2016-imili ingerlalluarneq suli attatiinnarneqarpoq. Saattuat iliuusissatut pilersaarut naapertorlugu suliffeqarfissuarmi tunisassiatut pingaarutilittut inissipput.

- Akerlianilli saarullik Atlantikup avannaaneersoq Royal Greenlandimut amigartoorutaajuarsinnarpoq. Taamaakkaluartoq aalajangerpugut Nutaaq-mik Maniitsumi suliniutitsinnut aningaasaliissuteqarnivut attatiinnarniarlugit, taamaalillutalu tunisassianik pitsaassuseqarluinnartunik inerisaaqqinnitsigut annertusaanerput pitsanngoriarteqqillugulu aningaasarsiornikkut iluaqutaalersissavarput, Mikael Thinghuus oqarpoq.

Naak aningaasaliissuteqarneq annertugaluaqisoq Royal Greenlandip akiitsui erniallit allannguuteqaratik 1,3 milliarder koruuniupput. Aningaasaliissuteqartarnerit ukiuni tulliuttuni suli qaffasittuarumaarput, pingaartumik kilisaatinik marlunnik pisineq suliffeqarfissuup aningaasarsiornissaanik patajaallisaasussaq eqqarsaatigalugu.

Nammineq aningaasaatit 1,4 milliarder koruuniupput patajaassusaalu 33 procentiulluni. Nammineq aningaasaatit ukiuni kingullerni tallimani 30 %-inik qaffariarsimapput.

Agguagarsiaqartitsisarnermut maleruagassiaq naapertorlugu Namminersorlutik Oqartussat iluanaarutit affaannik 64 millioner koruuniusunik agguagarsissapput. Taamaalilluni Royal Greenland Namminersorlutik Oqartussanut agguagarsisitsinermigut aammalu akisussaassuseqarfigalugit atukkanut akilersuinermigut ukiuni tallimani kingullerni 555 millioner koruuninik akiuleqarsimavoq.

Sulisut 2.533-upput, taakkunanngalu 54 %-it Kalaallit Nunaanni atorfeqarput. Tunisassiorfik Polenimi Koszalinimiittoq ukiup naatsorsiuiffiusup naajartornerani tunineqarpoq, taamaasillunilu Kalaallit Nunaanni sulisut 63 %-iulerlutik.

Royal Greenlandip Royal Greenland Academy aqqutigalugu Kalaallit Nunaanni ilinniartitsinermik ingerlatarisimasani 2017-imi nangippai. Qaffasissutsinut sisamanut pikkorissaasoqarpoq: Tunisassialerinermi ingerlatsisunut, tunisassiorfimmi ingerlatsisunut, aqutsisunut aammalu tunisassiornermik sulisunut. Kalaallit Nunaanni sulisut katillugit 753-it imaluunniit Kalaallit Nunaanni aalajangersimasumik sulisut 55 %-ii piginnaanngorsarneqarlutik 2017-imi pikkorissartinneqarput.

Aamma Kalaallit Nunaanni suliffeqarfinni sulisut atugaat pillugit 2017-imi misissuisoqarnerani paasineqarpoq sulisut atukkamikkut ilorrisimaarinnittut. Misissuinermi suliffeqarfiup isigineqarnera, suleqatigiinneq aamma suliat suunerat nalilerneqarmata Royal Greenland Kalaallit Nunaanni suliffeqarfinnut allanut sanilliullugu qaffasissorujussuarmik aammalu suliffeqarfiit agguaqatigiissinneqarneranni angusat qaangerlugit nalilerneqarpoq.

Siunissami ilimasuutit

Royal Greenlandip ukiuni kingullerni arfinilinni ingerlalluarnera tunisassianillu pingaarnernik Atlantikup avannaaneersunik patajaallisaanera 2018-imi nanginneqassaaq.

Taamaakkaluartoq ineriartorneq Kalaallit Nunaanni aalisakkanut akitsuutinit, tuniniaanerni pingaarnerni allamiut aningaasaasa appariaateqarnerannit kiisalu Newfoundlandimi pisassiissutit appariarnissaannik ilimasuutinit pissuteqartumik akimmiffeqarumaarpoq.

Taamaammallu angusat 2017-imisulli qaffasitsigissanngitinneqanngillat.

Naak aningasaliissuteqangaatsiartoqartussaagaluartoq akiitsut erniallit 2017-imisulli inissisimaannassangatinneqarput.

Annertunerusumik paasisaqarusuttut pisortaanermut Michael Thinghuusimut mobilnormu +45 50 89 30 00-imut siarnersinnaapput.

Asseq

 
 

Royal Greenland aperiguk

i
Write the text from the image