- Siornarniit procentinik qulinik qaffasinnerusunik saattussanik tunisisoqarpoq, taamaattumik ukioq manna saattuarniarnermi angusat naammagisimaarpavut. Sulisut sulilluarnikooqaat aamma tunisassiorfitta saattussanik tunisassiorneq eqqarsaatigaluagu Kalaallit Nunaanni tunisassiornerpaajummat tulluusimaarutigaarput, taama oqarpoq Paamiuni Royal Greenlandip tunisassiorfiani ingerlatsisoq, Jan Jørgensen.

Aqutsiveqarfimmi Paamiuni Nuummilu pisassat 1200 tonsit aalisarneqarsimalermata ippassaq decemberip arferngani saattuarniarneq unippoq. Aqutsiveqarfimmi Kujataani pisassat 225 tonsiusut aasaagaa 2018-imi aalisarneqareerput. Tassalu sumiiffinni pineqartuni saattuartasssat 70 procentii Paamiuni tunisassiorfimmut tunineqarput tunisassiarineqarlutillu.

Sulilluarput

Paamiuni tunisassiorfimmi saattussanik tunisassiornermi paarlagaallutik sulisut 50-it missingi sulisorineqarput. Ukioq manna aqutsiveqarfimmi Paamiuni Nuummilu saattuarnianeq januarip aallaqaataaniit juunip naajartornerata tungaanut ingerlariarluni matugallarpoq. Saattuarniat Paamiuni tunisassiorfimmut tunisisiartut ilaat asaanerani aqutsiveqarfimmi Kujataani saattuarniarput, kingorna aqutsveqarfimmi Paamiuni Nuummilu saattuarniarneq oktoberip aallaqaataani ammaqqimmat saattuarniat decemberip arferngata tungaanut Paamiuni tunisassiorfimmut tunisipput.

- Sulisutta sulilluarnerat tulluusimaarutigisorujussuuarput aamma neriuutigaarput 2019-imi saattuarniarnermi suli angusaqarnerujumaarluta, tunisassiorfimmi ingerlatsisoq oqarpoq. Taanna aamma oqarpoq saattussat tunineqartut 25 procentii saatuarniummik nutaajusumit Laila K.-imit tunineqarsimasut.

- Angallatit saattuarniutit arfineq pingasut missaaniittut Paamiuni tunisassiofimmut tunisisarput. Tunisat 25 procentiisa missingi saattuarniummit Laila K-imit tunineqarput. Saattussat pisarineqartut Paamiuni tunisassiorfimmut tunineqarnissaasa tungaanut Laila K.-ip tankiani uumatiinnarneqarsinnaagamik pitsaassutsikkut pitsaalluinnartuusarput. Tassa taamaattumik aamma tunisassiatta pitsaassutikkut pitsaalluinnartuunerat tulluusimaarutigaarput, Jan Jørgensen oqarpoq.

Royal Greenlandip naatsorsuutigaa Paamiuni tunisassiorfiup decemberip 19-iani juullimi matugallarnissaata tungaanut sulisut 50-it missaaniittut saarullilerinermi qaleralilerinermilu sulisoriinnassallugit. Januarip aappaani ukiumi nutaami sulineq aallarteqqippat sulisut suliassaqartinnissaat naatsorsuutigineqarpoq.

Allattoq: Inga Egede, ineg@royalgreenland.com

Assit: Jan Jørgensen

Asseq

 
 

Royal Greenland aperiguk

i
Write the text from the image