Sineriammi sumiiffinni assigiinngitsuni tunisassiorfiit ataasiakkaat sulisui aalisartullu tunisisartui aallaavigalugit juullimi puunnattaassanik tunniussuunneqartussanik pajuttorneqartarput. Tunisassiorfiit ilaat juullilernerani sulisunik aalisartunillu katerisimaartitsinerni agguaassisarput. Nunaqarfimmi Qeqertani Royal Greenlandip tunisassiorfiani sulisut ukioq manna puut 65-it sulisunut aalisartunullu agguaakkamikkit ullukinnermi decemberip 21-iani agguaappaat.

- Nunaqarfimmi aalisartut sulisuvullu tunisassiorfiup sutortarfianut qaaqqullugit ullukinnermi juullimi puunnattaassaannik agguaassiffigaavut. Ukioq manna aamma juullimi puunnattaat nuannaarutigineqaqaat, uaguttaaq aamma tunioraasinnaanerput nuannaarutigaarput. Ukioq manna aalisartut tunisassiorfimmut tunisinerpaat aamma saniatigut tunissuteqarfigissallugit toqqarparput, taama oqarpoq Qeqertani tunisassiorfiup ingerlatsisua, Anna Marie Mølgaard.

Kangaatsiami tunisassiorfimmi aqutsisut aalisartut tunisassiorfimmut qaaqqullugit juullimi puunnattaassaannik agguassiffigaat.

- Ukioq manna sulisutta juullimi puunnattaassatik siusissukkut tiguaat. Decemberip qulingani tunisassiorfimmi katerisimaaqatigiinnermi aalisartut juullimi puunnattaassaannik agguaassiffigaavut, taama oqaluttuarpoq Kangaatsiami Royal Greenlandip tunisassiorfiani tunisinermi aqutsisoq, Jørgen Inusugtoq. Jørgen Inusugtup juullimi puunnattaassat 140-it agguappai, taakkunannga 70-it sulisunut 70-illu aalisartunut.

- Siullermeerlunga juullimi puunnattaassanik agguaassivunga. Malunnarpoq tunissutisisut jullimi puunnattaassaminnik tunineqarnertik nuannaarutigigaat, Jørgen Inusugtoq oqarpoq.

Jullimi puunnattaat imaraat: suaasat qaqortut, mandelit sequtsikkat, naatsiaat glasimiittut, kirsebær sauce, mamakujuttut puussiaaqqat arfinillit, kaffit, fløde, puulukimineq qeerlutoorlu. Puut imarisaat septemberimi oktoberimilu tunisassiorfinnut ataasiakkaanut nassiussuunneqarput, Qaanamulli nassiussat apuunnissaat qulakkeerniarlugu aggustusimili nassiunneqarput.

Puut 100-it Qaanaami agguaanneqarput

Qaanaami sulisunut aalisartunullu juullimi puunnattaassaat 100-it agguaaneqarput. Inughuit Seafood A/S-ip tunisassiorfiani laboranti, Martaaraq Qaerngâk’ oqarpoq juullimi puunnattaassat aaneqanngitsut ippassaq decemberip 27-iani agguaanneqarsimasut.

- sulisut, sulisuusimasut aalisartullu juullimi puunnattaassanik aallersimanngitsut ippaassaq angerlarsimaffiinut pujuttorneqarput. Pajunneqartut nuannaajallanneri malunnarpoq aamma ajunngitsuliorfigineqarnertik tupaallaatigalugulu nuannaajallaatigeqaat. Inunnik nuannaartitsilluni nuanneqaaq, Martaaraq Qaerngâk’ oqarpoq.

Kujataani Aappilattumiit avannaani Qaanaaq tikillugu Royal Greenlandip sulisui aalisartullu tunisisartut katilllugit inuit 3794-it ukioq manna juullimi puunnattaassaannik tunineqarput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image