- Ullumikkut saarullinnik panersigasssanik tunisassiorpugut, kisianni sila pissutigalugu aamma aalisartut qilalugarniarnerat pissutigalugu tunisassiassaqannginnatta allatut ajornatumik sulisut 30-it ullumi angerlartittariaqarpagut. Naluara qaqugu tunisassioqqilissanerluta, taama oqarpoq Uummannami Royal Greenlandip tunisassiorfiani ingerlatsisoq, Kirsten Kristensen Worm.

Kirsten Kristensen Worm oqarpoq tunisassiassaaleqilertussaallutik siusissukkut ilisimaleramiuk decemberip sisamaanili suliffissarsiuussisarfimmut Majoriamut sulisunik angerlartitsiinnartariaqartussaanertik nalunaarutigisimallugu.

- Suli sikunnginnera, silap allaanngorarnera taarneralu pissutigalugu ukiup taamaalinerani tunisassiassaaleqilerneq pisinnaasarpoq. Sulisunik angerlartitsinnaartariaqalersinnaanerput pillugu suliffissarsiuussisarfimmut Majoriamut siusissukkut allagaqarlunga nalunaaruteqarnikuunera tunngavigalugu sulisuvut arlaqartut Majoriaq aqqutigalugu allamik suliffissarsipput, Kirsten Kristensen Worm oqarpoq. Taassuma aamma oqaatigaa sulisunik angerlartitsisariaqalernissartik Uummannami sulisartut peqatigiiffiannut USIP-imut aamma siusissukkut nalunaarutigisimallugu.

- Sila pissutigalugu tunisassiassaqannginnerput pissutigalugu angerlartitsinnaartariaqalersinnaanerput siusissukkut nalunaaruteqarnera Majoriami sulisut aamma USIP-imi aqutsisut naammagisimaarlugu nalunaarutigaat.

Uummannami Royal Greenlandip tunisassiorfianut aalisartut tuniseqqittalerpata sulisut aggersarneqarumaartut, Kirsten Kristensen Wormip oqaatigaa.

Allattoq: Inga Egede, ineg@royalgreenland.com

Asseq: RG

Asseq

 
 

Royal Greenland aperiguk

i
Write the text from the image