- Saattuni tunisassiorfik iluarsartuussisoqarnera pissutigalugu aggustusip aallaaqqaataanili matoqqanikuulluni sapaatip akunnera kingulleq ammaqqippoq. Tunisassiorfik siornatigut ullormut tonsinik tallimanik tunisassiorsinnaasimasoq maanna iluarsartuussinerup kingorna ullormut tonsit 15-it tunisassiorsinnaanngorpoq, taama oqarpoq Royal Greenlandimi tunisassialerinermi ingerlatsisoq, Niels Ole Møller.

Tunisassiorfiup iluarsartuunneqareernerani tunisassianik uninngasuusivik marloriaammik annertunerusunik uninngasuuteqarsinnaalerpoq, aalisakkanik immikoortiterivik nutaaq aamma qerinasuartitsiviit marluk ikkussuunneqarput, taamatuttaaq tunisassiornermi ingerlaarfiit nutarterneqarmata tunisassiorneq eqaannerusumik ingerlasinnaalerpoq.

Tunisassiorfimmi iluarsartuussinerup atortunillu nutarterinerup kingorna aalisartut Saattuni tunisassiorfimmut tunisisartut 50-it 60-illu akornanniittut siornatigorniit qaleralinnik pingasoriaammik amerlanerusunik tunisisinnaanngorput, kisiannili tunisassiorfik sulisussaaleqivoq.

Sulisussaaleqipput

- Tunisassioqqilernerput iluaraluarpoq aamma aalisartut saattuni tuniseqqittalernertik iluaraat, ajoraluartumillu sulisussaaleqivugut, taama oqarpoq Saattuni tunisassiorfiup ingerlatsisua, Marie Knudsen, imalu nassuiaavoq:

- Saattuni meeqqat atuareerneranni paaqqinnittarfik Avannaata Kommuneata matuaa, sulisuvullu arfineq marluusut ilaat ukiukitsunik meeraqaramik meeqqaminnik paarsissussaaleqinertik pissutigalugu suliffiup nalaani siusissukkut angerlaannartariaqartarput, naak ulloq naallugu sulerusukkaluarlutik. Sulisut angerlaannartariaqartarnerat tunisassiornitsinnut sunniuteqarpoq, ajoraluartumilli sulisinnaasunik allanik kommuuni innersuussisinnaanngimmat sulisussaaleqivugut, Marie Knudsen oqarpoq, nangipporlu:

- Taamaattumik inuit sianerfigisarlugit nunaqarfitsinni sulisussarsiorpugut.

Qaammatini sisamani Saattuni tunisassiorfiup matoqqanerani aalisartut amerlanerit Uummannamut tunisiartortarput; kisiannili aamma Saattuniit Uummannamut angallammik assartorneqartunik Saattut umiarsualivinut aalisakkanik tunisineq periarfissaasimavoq.

Saattuni tunisassiorfiup matoqqanerani sulisut Uummannap tunisassiorfiani sulisinnaanerat periarfissaavoq, sulisullu ataasip periarfissaq taanna atorsimavaa.

Saattuni tunisassiorfimmi qalerallit paperuerlugit niaquikkat aamma qalerallit ilivitsut tunisassiarineqartarput. Ulapaarfiup nalaani tunisassiorfimmi sulisut 15-it sulisorineqartarput.

Saattut 240-inik inoqarpoq.

Allattoq: Inga Egede, ineg@royalgreenland.com

Foto: Marie Knudsen.

Asseq

 
 

Royal Greenland aperiguk

i
Write the text from the image