- Maannakorpiaq Kullorsuarmi Innaarsunnilu suliniuteqarpugut. Tasiusami Nutaarmiunilu suliniutit 2018-imi aasaanerani ingerlanneqassapput. Nutarterinerit annertunerusunik tunisisoqarsinnaalerneranik, annertunerusunik tunisassiorsinnaalernermik minnerunngitsumillu tunisassianik naleqarnerulersitsinermik nassataqassaaq, taama oqarpoq Upernavimmi tunisassialerinermi ingerlatsisuugallartoq Knud Mathiesen, nangipporlu:

- Maanna containerit qulit qerititsivittut atugassat Kullorsuarmi ikkussuunneqareersut marsimi innaallagissamut attavilerneqareerunik atuutilissapput. Taamalilluni Kullorsuarmi qerititsivimmiittuutigisinnaasat 200 tonsinik annertusissammata aalisartut annertunerusunik tunisisinnaalissapput taamatuttaaq siornatigut april tikillugu tunisisinnaasarsimallutik maanna maj ilanngullugu tunisisinnaalissapput. Aamma sulisuvut qulit missaaniittut maj ilanngullugu sulisinnaalerput.

Qalerallit nerpiinik tunisassiussapput

Qerinasuartitsiviit nutaat qalerallillu nerpiinik tunisassiornermi suliaqarfiusartoq Innaarsunni 2018-imi marsimi ikkussuunneqassapput

- Innaarsunni maannamut aalisakkat ataasiakkaarlugit qerinasuartittarpagut, kisiannili 2018-mi marsimi qerinasuartitsiviit nutaat ikkussuunneqarpata aalisakkat blokkikkaarlugit qeritissinnaalissavagut. Aalisakkat blokkikkaarlugit qerititat inikinneerarsuusarmata qerititsivinni inissaqartitsinerulissaagut. Innaarsunni aasaru qalerallit nerpiinik tunisassiulerutta sulisut maanna 20-iusut 30-nngortillugit amerlisussaassavagut, Knud Mathiesen oqarpoq.

Tunisassianik naleqarnerulersitsineq

2018-imi aasaanerani Tasiusami aamma Nutaarmiuni qerinasuartitsivinnik nutaanik ikkussuisoqassaaq ..

- Royal Greenlandip tunisassianik naleqarnerulersitsiniarluni suliniuteqarnera naapertorlugu sapaatip akunnerata tulliani Nutaarmiuni siornatigut qalerallit ilivitsuutillugit qeritittakkavut niaquerlugit paperuiarlugillu tunisassiarisalissavagut. Taamaattumik sapaatip akunnerata tulliani sulisut quliusut 15-inngortillugit ilassavagut, Knud Mahiesen oqarpoq.

Tasiusami qaleralinnik niaquikkanik paperuikkanillu maannamut tunisassiortarput aasaaneranili 2018-imi nerpinnik tunisassiorneq ingerlanneqalisaaq aamma.

Suliniutit allat

Innaarsummi Aappilattumilu avataaniit tikisitsilluni sulisoqarnissaq pisariaqartinneqarmat Royal Greenland pilersaaruteqarpoq nunaqarfinni taakkunani sulisut inissaannik 2018-imi sanaartortitsiniarluni.

Upernaviup eqqaani nunaqarfinni Royal Greenlandip suliniutigisaasa ilagaat nunaqarfinni Kullorsuarmi Nuussuarmilu tunisassiorfiit piginneqatigiiffinngortinneqarnerat taaguuserlugu Arctic Fish.

- Aalisartut Royal Greenlandimilu sulisut piginneqatigiiffimmi ilaasortanngorsinnaasutut qaaqquneqarput. Nuannaarutigeqaarput aalisartuunerusut 92-it piginneqatigiiffiup ineriartornissaanut tapersersuillutik piginneqataalerumallutik nalunaarmata. Piginneqatigiiffimmik pilersitsinikkut Royal Greenlandip sumiiffimmi piginneqataasut aalajangiisarnerni peqatigalugit piginneqatigiiffiup ingerlalluaannarnissaanik qulakkeerinnissinnaaneq kissaatigaa, Royal Greenlandip suliffeqarfissuarmi tunisassiornermut pisortaa Lars Nielsen oqarpoq, nangipporlu:

-Piginneqatigiiffik taama ittoq atorlugu piginneqataaneq sunniuteqaqataanerlu misilissagatsigu qilanaaraarput, iluatsissappallu sumiiffinni allani piginneqatigiiffinnik pilersitsisinnaaneq isumaliutigisariaqarparput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image