- Kangaatsimi nunaqarfiinilu Royal Greenlandip tunitsiviini piffissami 2012-imiit 2017-imut tunisassiorneq 800 tonisimiit 3500 tonsimut qaaffariaateqarpoq. Qaffariaat 400 procentingajannik qaffariarneruvoq. Kangaatsimi nunaqarfiinilu tunisassiornerup qaffariaateqangaatsiarnera nuannaarutissaavoq aamma Kangaatsiami pigisaanilu nunaqarfinni suliniutivut isumalluarnarput, Royal Greenlandimi tunisassialerinermi ingerlatsisoq, Sten Sørensen oqarpoq.

Royal Greenlandip Kangaatsiami tunisassiorfiani majimi 2014-imi saarulliit nerpiinik tunisassiornermi atortunik ikkussuisoqarpoq. Kingorna tunisassiorneq annertusiartuinnarpoq sulisullu amerliartuinnavillutik, taamattumillu Kangaatsiami tunisassiornermi qaffariarneq annertunerpaajuvoq. Kangaatsiami Royal Greenlandip tunisassiorfiani tunisinerit 2012-imi 400 tonsiusimallutik 2017-imi 2000 tonsiupput.

Nunaqarfinni tunisassiorfiit

Arctic Green Foodi akiliisinnaajunnaarmat 2014-imi Attumi tunisassiorfik Royal Greenlandip ingerlatarilerpaa. Attumi tunisassiorfiup illutaa Royal Greenland nutarterpaa taamatullu quersuaq qerititsiviutigisoq inuussutissalerinermut nakkutilliisoqarfiup akuerisaanut naapertuuttunngorlugu nutarterlugu. Kingorna ingerlaavartumik tunisassiorsinnaasunngorlugu qerisunut ilioqqaaviusunik containerinik pingasunik inissiisoqarpoq, naak Royal Arctic Linep umiarsuit assartuutaasa assartuisarnerat killeqaraluartoq.

- Niaqornaarsummi illu sulliviusimasup affaa allanngortillugu sananeratigut Royal Greenlandip tunisassiorfinngortippaa, tassani allilerisoqarlunilu containerinik marlunnik inissiisoqarpoq. Taamaattumik Arctic Umiaq Linep angalanissamik pilersaarutitik malissinnaajunnaaraangatigik aamma Niaqornaarsunni tunisassiorneq annertunerusoq ingerlanneqarsinnaalernikuuvoq, taamatuutaaq allilerinerup nassatarisaanik tunisassiorneq ingerlaavarsinnaanngorluni. Niaqornaarsummi tunisassiorfik Royal Greenlandip tunisassirfiini saarullinnik tarajortikkanik tunisassiorfiunerpaajuvoq, Sten Sørensen oqarpoq, nangipporlu:

- Ikerasaarsummi saarullinnik tarajortikkanik aamma tunisassiorpugut, tassani 2012-imiit 2017-imut tunisineq marloriaatingajannik qaffappoq.

Qerisuusiviit imaavinneqarneq ajorput

Sten Sørensen oqarpoq Royal Arctic Linep Kangaatsiami eqqaanilu usinik assartuinikkut piginnaasai ataatsimut isigalugu annikippallaartoq.

- Naak Royal Arctic Linep usinik assartuisarnera ingerlaavartumik ingerlanneqartaraluartoq assartuisoqartillugu qerisuusivigut tamakkiisumik imaarneqarneq ajorput.Taamaattoqarnerata nassataraa qerisuusiviit ulikaaraangata tunisinerit matusariaqartarnerat taamatuttaaq piffissami sivikitsumi sulisut angerlartiinnartariaqartarput. 2017-mi ajornartorsiut annertuseriarpoq, soorlu aamma 2017-imi juulleriartornerani Kangaatsiami taama pisoqarmat tunisineq matullugu sulisunik angerlartitsisariaqarsimavugut. Taama pisoqartarnera pinngitsoortinnniarlugu, akuersissummik pisinnaassagutta, 2018-imi ulapaarfiup nalaani Kangaatsiami eqqaanilu umiarsuaq uumatitsiviusoq atorlugu kiffartuussisinnaanissarput pilersaarutigaarput, sten Sørensen oqarpoq.

Kangaatsiami tunisassiorfimmi teknikkikkut nutarterinerit ingerlanneqarputtaaq.

- Kangaatsiami qerinasuartitsivik nutaaq decembarimi 2017-imi ikkussuunneqarneratigut saarulliit nerpiinik tunisassiornerup annertusisinnaanera periarfissanngorpoq. Kangaatsiami sulisut ineqarfigisinnasaannik illunik pingasunik pisinukkuvugutt taamatuttaaq quersuarmik pisinikuullutalu aalisakkanik angisuunik qerinasuartitsivimmik ikkussisoqarnikuuvoq. Kangaatsiap eqqaani nunaqarfinneersunik sulisussaqarniarnissarput anguniagaraarput, taamaasilluta suleqatigiiaanik marlunnik sulisoqarluta saarulliit nerpiinik tunisassiornerup annertusinissaa anguniarlutigu. Sulisut 20-nik ilanerisigut tunisassiorneruneq taamatullu isertitat annertusineqarnissaat anguniagaraarput, Sten Sørensen oqarpoq.

Kangaatsiami Royal Greenlandip tunisassiorfiani 2017-imi ulapaarfiup nalaani inuit 60-it 65-illu akornanni sulisorineqarsimasut, 2018-imi ulapaarfiup nalaani inuit 80-it missingi sulisorineqarnissaat naatsorsuutigineqartoq, Kangaatsiami Royal Greenlandip tunisassiorfiani ingerlatsisoq, Abia Thorsteinsen paasissutissiivoq.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image