Qeqertarsuarmi tunisassiorfik Royal Greenlandip pingaarnertut ammassannik tunisassiortartua nalinginnaasumik ukiumut 100 tonsit missaannik tunisassiaasartut 20 %-it misserluinnaannik tunisassiorsinnaasimavoq.

- Ammassaat silap nillernerujussua pissutigalugu sinerissamut tulakkusuppiarsimanngillat. Ilutigisaanillu saattuat ammassallu ataatsikkoortillugit tunisassiarisinnaanngeriaratsigit saattuat tunisassiarissallugit aalajangersimavugut, Jakob Broberg Qeqertarsuarmi tunisassiorfimmi ingerlatsisoq oqarpoq.

Tunisassiorfiup ammassannik 20 tonsit missaanniittunik tunisassiai Paamiuni Qeqertarsuarmilu aalisarnermi neqitsersuutissatut naammaannarput, Royal Greenlandillu tunisassiorfeqarfii neqitsersuutissanik allanik nassaarniartariaqassapput.

Misileraalluni ammassanniarneq

- Ammassaat 9 kiilukkaarlugit poortukkatut Qeqertarsuup tunisassiorfiani tunisassiarineqartartut aalisakkat mikisunnguuneri peqqutigalugit qeritipallanneqarsinnasaramik qaffasinnerpaamik pitsaassuseqartarput. Aamma nunatsinni tunisassianik tuniniaasarfik ammassannik niuertarfinnut ajoraluartumik pilersuisinnaanngilaq, tunisassiorfimmi ingerlatsisoq oqarpoq, ilisimatitsissutigaalu tunisassiorfik misileraalluni ammassanniartitsileruttorpoq.

- Ammassaat aasaanerani sinerissamut uteqqittarput, maannalu ammassanniartitsilluta aallarteruttorpugut, ukiallu tungaanut ingerlatissallugu. Maannamut angallatit marluk umiatsiaararlu ataaseq ammassannik ajunngitsumik pitsaassusilinnik pisaqareerput. Ammassaat ukiariartornera ilutigalugu orsunikkiartortaramik, taamaattullu aasserneqariarlutik amii atasinnaajunnaartaramik taamalu neqitsersuutitut atorsinnaajunnaartarlutik. Takussavarpulli suli orsunipallallaarsimanngitsunik qanoq pisaqartigisinnaanerluta, tunisassiorfimmi ingerlatsisoq oqarpoq.

Tunisassiorfimmi ingerlatsisup ukioq manna ammassannik tunisassiassaraluanik annaasaqarneq ilinniarfigalugu aappaagussamut ammassannik amigaateqannginnissaq eqqanaarsarfigaa.

- Aappaagu saattuanik ammassannillu ataatsikkut tunisassiornissaq siunniupparput. Taamaammat silaannaarilluni poortuutissanik marlunnik inniminniivunga, taamaasilluta ataatsimik pigeriigarput iluaqutsiullugu sukkanerusumik tunisassiorsinnaassaagut niuertarfinnullu pilersuilluta, Jakob Broberg oqarpoq.

Ammassaat Kalaallit Nunaanni nerisannaat ilagaat, panertutut, uusutut siatatullu nerineqartarlutik.

Allattoq: Káte Hansen, kaha@royalgreenland.com

Asseq: RG

Asseq

 
 

Royal Greenland aperiguk

i
Write the text from the image