Innaarsunni tunisassiorfik iluliarsuup nunaqarfiup avataaniittup aseroratarsinnaanera pissutigalugu qimagutsitsiffiusumut ippassaq ualikkut kingusissoq tikillugu ilaasimanngilaq.

- Iluliarsuaq ippassaq tikillugu alaatsinaattuarsimavarput, iluliarsuullu aseroratarsinnaanera sillimaffigalugu qimarngutitsinissamik pilersaarut piareersimatissimavarput. Naliliisinnaanerput naapertorlugu tunisassiorfik qutsissumiippoq navianartorsiorfiusumiiganilu, taamaakkaluartorli ilisimatinneqarpugut tunisassiorfeqarfiup iluanut appakaakkutta politiit maleruaqqusaannik unioqqutitsisutut unnerluutigineqassasugut, Flemming Andersen Upernavimmi nunaqarfiinilu tunisassiorfinnut ingerlatsisoq oqarpoq nangillunilu:

- Qalerallit 175 tonsit missaanniittut Innaarsunni qerititsivimmiittuutigaagut, taakkunannga 167 tonsit tunisassiaapput naammasseriikkat, naammassineqavinngitsut 8 tonsit aammalu neqitsersuutissat 31 tonsit. Qerititsiveqarfipput nakkutigisinnaatitaanngippat qerisuutigut asiuinnassapput. Paasitinneqaraluarpugut nukissiorfik avataanit aqunneqarsinnaasoq, orsussarli nunguppat qerisuutigut annaasinnaavagut.

Innaarsunni tunisassiorfimmi ingerlatsisoq Hans Peter Kristensen ippassaq ataasinngornermi ualikkut sisamat missaanni kommuunip allaffeqarfianukaqquneqarsimavoq tassanilu ilisimatinneqarluni qimagussuuffiusoq annertusineqartoq aammalu tunisassiorfik navianartorsiorfiusup iluaniittutut naatsorsuutigineqalersoq.

- Arfernup missaani unnuarsiortussat suliartoqqammersullu tunisassiorfimmut uterpunga. Sulisut tunisassiorfimmit qimagunnissaannik oqarfigaakka, unnukkullu arfineq-pingasut missaanni killilersuutit aappalaartunik qaqortunillu qalipaatillit atorlugit tunisassiorfik pallitsaalineqarpoq.

- Tunisassiorfimmi 25-t missaannik paarlakaajaattunik sulisoqarluta ulappuseruttoraluarpugut, qujanartumilli aalisagaatigut qeritereerpagut, Innaarsunni tunisassiorfimmi ingerlatsisoq Hans Peter Kristensen oqarpoq.

Sulisunit 25-usunit aqqaneq-marluk sinerissamit suliartortuupput, taakkunanngalu sisamat Tunumeersuullutik. Allat sisamat Tunumeersut Innaarsunnut suliartorlutik ulluni qaninnerni tikittussaagaluarput.

Innaarsunni tunisassiorfik 550 tonsinik qerititaqarsinnaavoq aammalu ulloq unnuarlu 14 tonsinik tunisassiorfiusinnaalluni.

Allattoq: Káte Hansen, kaha@royalgreenland.com

Asseq: Hans Peter Kristensen

Asseq

 
 

Royal Greenland aperiguk

i
Write the text from the image