- Umiarsuaq amutsiviup singissimasaasa oqimaannersaraat, taammaammat pissanngatigineqalaarsimavoq, taamaakkaluartorli singinneqarnera pissusissamisoorluinnartumik ingerlanneqarpoq, suliffeqarfissuarmi tunisassiornermi pisortaq Lars Nielsen singitsinermik qanimut malinnaasoq oqarpoq.

Kilisaat aappaagu maajip qaammataani naammassillugu sananeqareerlunilu tunniunneqartussaasoq assilineqarlunilu videoliarineqarpoq. Sananeqarnerani assit uani takuneqarsinnaapput: https://www.royalgreenland.com/da/royal-greenland/vores-lokationer/trawlerbyggeri/, aammalu sananeqarnerata singinneqarneratalu videoliarineqarnera kingulleq uani takuneqarsinnaavoq.

Kilisaatip kilisaat pioreersoq Sisimiut taarsertussaavaa, Royal Greenlandillu Spaniami kilisaatinik marlunnik sanatitaasa aapparaa. Kilisaat tapertariissitsilluni saarullinnik qaleralinnillu kilisattartussatut sananeqarpoq, tamatumalu saniatigut aalisakkat perlukuinik qajuusiorfiusinnaallunilu aalisakkat orsuannik uulialiortassaaq.

Kilisaat singinneqaqqammersoq 82,65 meterinik takissuseqarpoq, 17 meterinik silissuseqarluni aammalu usisarfia 1750 kubikmeteriulluni. Kilisaat pioreersoq nutaamit singinneqaqqammersumillu taarserneqartussaq 66 meterinik takissuseqarpoq usisarfialu 1200 kubikmeteriulluni.

Kilisaatitaassaq kisermaattarissanik marluuttarissanillu 30-nik initaqassaaq, palletsilersuinerlu umiarsuarmi pisassaaq, palletsinillu 866-inik inissaqartitsilluni. Umiarsuarmi pallatsilersuisarnikkut sivikinnerusumik usingiartoqarsinnaalerlunilu tunisassianik tuniniaaneq pilertornerulissaaq, taamalu tunisassiat nutaanerusut tuniniarneqarsinnaalissallutik.

Kilisaatit marluk Royal Greenlandip aningaasaliissuteqarfigisaasa kingullersarigallagaat 700 millioner koruuninik akeqarput, avataasiorlunilu aalisarnerup eqaallisarneqarnissaannut annertusarneqarnissaanullu atorneqassapput.

Kilisaatit marluk ungasiliartaatitut Svalbardip, Ruslandip aamma nunatta kitaata avannaanut aalisariartassapput.

Kilisaatit Sisimiut aamma Qaqqatsiaq tunineqarumaartut aappaa 1992-imi aappaalu 2002-mi sanaajupput.

Allattoq: Káte Hansen, kaha@royalgreenland.com

Assit videolu: RG

Asseq

 
 

Royal Greenland aperiguk

i
Write the text from the image