- Aalisartut ilaqutaallu aningaasaateqarnerulersut malunnarpoq. Aappilattumi tunitsivik Royal Greenlandimit 2014-imi ammarneqarmalli nunaqarfimmi siuariaateqarneq nunaqarfimmi Aappilattumi najugalinnut tamanut iluaqutaalluarpoq. Aappilattumi aalisarnerup siunissami ingalluni ingerlallualissasoq Aappilattormiuusugut tamatta neriuutigaarput, Aappilattumi tunitsvimmi aqutsisoq Nikolaj Benjaminsen oqarpoq.

Suliniutit

Aappilattumi tunitsiviup ammarnerata kingorna Royal Greenland Aappilattumi aalisarnerup ingerlallualernissaa tamannalu ilutigalugu tunitsivimmut tunisat annertunerulernissaat anguniarlugit illumik aalisartunut Aappilattup avataaneersunut illusisimmavissamik pisinikkut taamatuttaaq aalisartunut arfineq-marlunnut umiatsiaaqqanik aalisarnermullu atortunik pisinermut aningaasanik atukkiinikkut arlalinnik suliniuteqartarsimavoq.

Royal Greenland umiatsiaaqqanik Pocanik pingasunik Aappilattumi aalisartunut pingasunut immikkut attartortitassanik juuli 2017-imi pisivoq. Aalisartut taakku pingasut umiatsiaaqqat attartukkatik pisiarinissaannut periarfissaqarput, pisiarinissaallumi siunertaraat. Taamatuttaaq aalisartut sisamat allat tamarmik immikkut Pocamik atortulersoriikkamik umiatsiaarartaarput. Aalisartut taakku sisamat umiatsiaaqqamik pisinissaminnut ESU-mit tapiiffigineqarlutillu Royal Greenlandimit aningaasanik atukkinneqarput. Aappilattumi tunitsivimmi aqutsisup oqaatigaa, umiatsiaaqqanik Poca 600-nik pingasunik aalisartunut pingasunut immikkut attartortitassanik pisineq kinguneqarlualereersoq.

- Aalisartut pingasut tamarmik immikkut umiatsiaaqqamik Poca 600-mik attartortitaasut umiatsiaarartaaminnik aalisartaleramilli qalerallit tunisaasa annertussusaat marloriaatinngorput tamannalu ilutigalugu isertitaasa amerlassusaat aamma marloriaatinngorlutik. Taamaammat aalisartut sisamat allat sapaatip-akunnerani kingullermi umiatsiaarartaartut tunisaqarluartalernissaannut aamma neriuuteqarluarpunga, Nikolaj Benjaminsen oqarpoq.

Siuariaateqartoqarnera qujamasuutigigaa

Nunaqarfeeqqami Aappilattumi 111-nik inulimmi siuariaateqartoqarnera Kommune Kujalliup Inuussutissarsiornermut Suliffeqarnermullu Ataatsimiititaliaani siulittaasumit Simon Simonsenimit qujamasuutigineqarpoq.

- Royal Greenlandip Aappilattumi tunitsivik ammarsimammagu Aappilattumilu aalisarnerup siuarsarnissaa anguniarlugu tunitsivimmik ammaareernermi kingorna arlalinnik suliniuteqartarsimanera qujamasuutigaarput. Aappilattormiut imminnut pilersulernerat amerlasuullu aningaasanik ikiorsiissutinik pisartagaqarunnaarsimasut malugusunnarpoq. Tamanna Aappilattormiunut aammalumi Kommune Kujalliup aningaasaqarniarneranut iluaqutaavoq. Aappilattumi aalisarnerup siuariaateqarnerata ilutigisaanik Aappilattup aningaasaqarniarnera siuariaateqarfiujuartuarsinnassasoq neriuutigaarput, Simon Simonsen oqarpoq.

Umiatsiaararsorlutik aalisartut 24-t qaleralittatik Royal Greenlandip Aappilattumi tunitsivianut sisamanik sulisulimmut tunisarpaat.

Allattoq: Inga Egede, ineg@royalgreenland.com

Assit: Møller Lyberth

Asseq

 
 

Royal Greenland aperiguk

i
Write the text from the image