- Ukioq manna saarulliit issimi panertitat 40 tonsit missingi tunisassiarisinnaassagivut naatsorsuutigivara, taakkulu siorna panertitatsinniit annertunerupput, taama oqarpoq Kangaamiuni Royal Greenlandip tunisassiorfiani tunitsivimmi aqutsisoq Kristian Larsen.

Kangaamiuni saarulliit issimi panertitat siulliit decembarimili atuisartunut nasssiunneqarnikuupput, maannalu saarulliit issimi panertitat 500 kiilut missaaniittut Nuummi Royal Greenlandip nunatsinni tunisassianik tuniniaavianut nassiunneqassallutik poortorneqareernikuupput.

- Mannakkorpiaq saarulliit 36 tonsit miissaaniitut panerserneqarput, issiinnassariarpallu nutaat allat aamma piffissami aggersumi panerpata nassiussuunneqassapput. Issiinnassappat saarullinnik panertitassanik nivinngaassuinerput marsip naanerata tungaanut ingerlassinnaasasoq, taakkulu majimi poortorneqarumaartut naatsorsuutigara, Kristian Larsen oqarpoq.

Sila aalajangiisuuvoq

Aalisakkanik issimi panertitanik tunisassiornermi sila aalajangiisuulluinnartartoq Kristian Larsenip oqaatigaa.

- Ukioq manna isserujussuarnani ataavartumik issinnerata nassatarisaanik ingerlaavartumik aalisakkanik issimi panertitanik tunisassiornerput ingerlavoq. Issippallaartumi aalisakkat panertikkuminaannerusarmata ukioq manna issippallaarnani ataavarnerusumik issimmat aalisakkanik issimi panertitanik tunisassiornerput ingerlalluarmat siulliit oktoberimili nivinngaasorneqartut decemberimi nassiussorneqarput, Kristian Larsen oqarpoq.

Kangaamiuni tunisassiorfimmi sulisut aqqaniliusut qeeqqanik issimi panertitanik aamma tunisassiorput.

Attumi, Ikamiuni, Uummannami Ukkusissanilu Royal Greenlandip tunisassiorfiini aamma saarullinnik issimi panertitanik tunisassiortarput.

Allattoq: Inga Egede, ineg@royalgreenland.com

Assit : RG

Asseq

 
 

Royal Greenland aperiguk

i
Write the text from the image