Royal Greenlandip allaffissuani, tunisassiorfiani aammalu nunatsinni tuniniaaviani sulisut 48-it peqatigalugit Vilhelm Willumsen februarip aallaqqaataaniit 28-iat ilanngullugu oqilineqqusaannermik unammisitsinermi peqataavoq.

Nuummi Royal Greenlandip allaffissuani, tunisasiorfiani nunatsinnilu tuniniaavimmi sulisut immikkoortortani suleqatitik peqatigalugit februari naallugu oqilineqqusaannermik unammisitsinermi peqataapput. Oqilineqqusaalluni unammisitsineq Royal Greenlandimi peqqinnissamut aallartitat igasoq Sune Bjerre ingerlatsisoralugu aaqqissuuppaat.

- Oqilineqqusaannermik unammisitsineq Royal Greenlandimi sulisut peqqinnerusumik inuuneqarnissaat anguniarlugu nerisaqarneq, timersorneq aammalu peqqissuuneq qulequtaralugit ukioq naallugu qaammatikkaartunik aaqqissuussinissatsinnut ilaavoq. Sulisut 49-it peqataasut katillutik 60,6 kiilu oqiligamik oqilineqqusaannermik unammisitsineq iluatsilluarpoq, Sune Bjerre oqarpoq.

Sukkutornaveersaarlunilu qajuusalittornaveersaarpoq

Tassalu Vilhelm Willumsenip 8,3 kiilunik oqilineratigut Royal Greenlandimi aningaasarsialerifimmi sulisut agguaqatigiisillugu 2.371 graminik oqiligamik unammisitsinermi immikoortortaqarfiit aqqanillit inuillu 49-it peqataasut akornanni ajugaapput.

Qanormi taava iliorluni qaammatip ataatsit iluani kiilut arfineq pingasut oqilisoqarsinnaava?

- Oqilineqqusaannermik unammisitsineq aallartinngitsorli sukkutornaveersaarlungalu qajuusanik akulinnik nerinaveersaarlunga oqilinissara anguniarpara. Piumassuseralu annertuseqaaq suleqatikka oqilineqqusaannermik unammisitsinermi peqataalermata. Aamma tamatta ataatsimoorluta oqilerusulluta iliuuseqarnerput suleqatigiinnitsinnut pitsaasumik sunniuteqarpoq, Vilhelm Willumsen oqarpoq.

Royal Greenlandimi peqqinnissamut aallartitat pilersinneqarput sulisut akornanni peqqissumik nerisaqarnikkut timersornikkullu peqqissuunissaat pingaartillugu Royal Greenlandimi sulisoqarnermut immikkoortortaqarfia sineriammi sulisut pingasut, ilaatigut igasoq Sune Bjerrep peqataaffigisaanik pikkorissartinneqareernerisa kingorna.

- Pikkorissartitsinermi peqataareernerma kingorna Royal Greenlandimi sulisut arfinillit peqatigalugit Royal Greenlandimi peqqinnissamut aallartitat pilersippavut, taakkulu sulisut peqqinnerusumik inooriaaseqarnissaat anguniarlugu ukiup ataatsip ingerlanerani sulisunik susassaqartitsisartussaapput, tassalu oqilineqqusaannermik unammisitsineq susassaqartitsinernut ilaavoq, Sune Bjerre oqarpoq.

Royal Greenlandip nunatsinni tuniniaaviani sulisut agguaqatigiisillugu kiilut marluk oqiligamik oqilineqqusaannermi ajugaasut aapparaat, suliffeqarfissuarmilu quleriit sisamaanni sulisut agguaqatigiisillugu 1,7 kiilunik oqiligamik oqilineqqusaannermi pingajuupput.

Allattoq: Inga Egede, ineg@royalgreenland.com

Asseq: Mette Willumsen

Asseq

 
 

Royal Greenland aperiguk

i
Write the text from the image