- Sarullinnik issimit panertitanik aamma maskiinamik panertitanik tunisaqarnerput qaffariangaatsiarpoq, kisiannili tunisatta qaffariaateqarneranut ilaatigut aamma tunisassianik naleqquttunik tunisassiaateqalernerput pissutigalugu pisisartut nunatsinni tunisassianik piserusunnerulernikuupput. Aamma pisisartutsinnut allanut, soorlu neriniartarfinnut igaffissuarnullu tunisavut qaaffariaateqarput, taama oqarpoq Nunatsinni tunisassianik tuniniaavimmi ingerlatsisoq, Malik Hegelund Olsen, nangipporlu:

- Oktoberimi tunisatta qaffariaateqarnerannut aamma pisisartuvut sikusartumi najugallit sikunnginnerani annertunerusunik pisinerannik pissuteqarpoq.

Suliniutit

Ukiuni kingullerni Royal Greenlandimi Nunatsinni tunisassianik tuniniaaviani aalisakkanik tunisassianik ineriikkanik nutaanik ilisarititsisarput taamatullu nerisassanik saqqummersitsinerni saqqumilaartitsisarlutik.

- Aalisakkanik tunisassianik nutaanik soorlu saarulliit siariaannaat gluten-imik akuutissartaqanngitsut tuniniagarilerpagut, taamatuttaaq nerisassanik saqqummersitsinerni peqataanerusalerpugut. Soorngunami aalisakkanik tunisassianik saqqumilaartitsinerulernerput tunisassianillu nutaanik saqqummersitsinerput tunisassiatsinnik tunisaqarnerulernitsinnut pissutaapput, Malik Hegelund Olsen oqarpoq, nangipporlu:

- Pisisartuvut aalajaatsuupput, taakkulu attaveqarfigilluarnerisigut aalisakkanik tunisassiat assiginngitsut amerlanerusut siammarterneqartarput tunineqarlutillu, tamannalu pingaarteqaarput

Royal Greenlandimi Nunatsinni tunisassianik tuniniaaviani suleqatigiit aalisakkanik tunisassianik tunisaqarneruleriartornertik nuannaarutigalugu naammagisimaarpaat. Siorna, 2017-imi Nunatsinni tunisassianik tuniniaaviup 21 millioner koruunit 22 millioner koruunillu akornanni kaaviijaartippaat. Taammaattumik suleqatigiit naatsorsuutigaat ukioq manna tunisaqarnerussallutik.

- Nunatsinni tunisassiat tunineqarnerisa annertusiartuinnarnerat nuannaarutigalugu naammagisimaarparput. Taammaattoqarnera piumassuseqalersitsilluni angusaqarusunnermik pilersitsivoq, taamaattumiki ukioq manna sirnarniit tunisaqarnerunissarput naatsorsuutigaarput, Malik Hegelund Olsen oqarpoq.

Allattoq: Inga Egede, ineg@royalgreenland.com
Foto: RG

Asseq

 
 

Royal Greenland aperiguk

i
Write the text from the image