Kangaatsiami nunaqarfiinilu aalisartut peqataatillugit ukioq manna Royal Greenlandip Kangaatsiap pigisaani saarullinnik uumasunik aalisartitsinera iluatsilluarpoq. Saarulliit uumatitsivimmitsitat Maniitsumi Royal Greenlandip tunisassiorfiani Nutaaq Cod- iliarineqartut umiarsuarmut uumatitsivittalimmut Maniitsumut saarulliit tunineqartut sisamararterutaat Kangaatsiap Aasiaallu eqqaani nunaqarfinni aalisartut tunivaat.

Aalisartut Kangaatsiameersut eqqaanilu nunaqarfinneersut kiisalu aalisartut Aasiaat Ilulissallu eqqaaneersut katillutik 56-it ukioq manna siullermeerlutik saarullinnik uumasunik tunisipput, tassalu aalisartut taakku ukioq manna saarulliit Maniitsumi Royal Greenlandip tunisassiorfianut tuninesat sisamararterutaat tunivaat.

- Siornatigut sapaatip akunneranut marloriarlunga saarulliit karsit 15-it tunisinnaasarsimagakkit, aamma saarullinnik uumatitsivimmiitsitanik tunisinerput aatsaat julimi aallartikkaluartoq, ukioq manna saarullinnik uumasunik tunisisinera pissutigalugu aningaasatigut uannut iluanaarutaavoq, Lukas Siegstad, Ikerasaarsummi aalisartoq oqarpoq.

Kangaatsiap eqqani uumatitsiviit atorlugit aalisarnermi aalisartut Attumeersut 16-it, Iginniarfimmeersut sisamat, Ikerasaarsummeersut 13-it , Niaqornaarsummeersut qulingiluat, Kangaatsiameersut arfineq pingasut, Aasianneersut sisamat, Akunnaanersoq ataaseq aalisartorlu ataaseq Ilulissaneersoq peqataapput.

Lukas Siegstadili saarullinnik uumatitsivinniititanik aalisarnermi kisimi aningaasatigut iluanaaruteqanngitsoq, Kangaatsiap eqqaani aalisarnermi akisussaasoq, Maniitsumi aalisarnermut siunnersorti, Hans Larsen Hansen oqarpoq.

- Kangaatsiap eqqaani aalisarnermi aalisartut 56-it peqataasut amerlanerpaartaasa ukioq manna saarulinnik uumatitsiviinniitsitanik aalisarnermi akuutinneqarnertik naammagisimaarpaat. Aalisartut isertitaqarnerulernermikkut ilaat aquuteralattaarput allat umiatsiartaartaarput allallu sikuppat piniutissaminnik qamuteralassinissaminnut akissaqalerput. Taammaattumik aalisartut aappaagu saarullinnik uumatitsivimmiitianik aalisaqiinnssaminnut qilanaarput, Hans Larsen Hansen oqarpoq.

Akuersissut kingusissukkut pissarsiarineqarpoq

Kangaatsipa eqqaani saarullinnik uumatitsivimmiitsitanik aalisarsinnaanermut akuersissut juni naasoq aatsaat pissarsiarneqarmat juuli aallartereersoq saarullinnik uumatitsivimmiititsilluni aalisarneq aatsaat aallartippoq.

- Saarullunnianeq ingerlangaatsiareersoq saarullinnik uumatitsivimmiititanik tunisisinnaanerput aallartippoq. Tamanna uggornarpoq, aallartiaarsimasuuguttami isertiqarnerusimassagaluaratta. Taamaattumik neriuutigaara aappaagu saarullinnik uumatitsivimmiititanik tunisineq siusinnerusukkut aallartikkumaartoq, Lukas Siegstad oqarpoq.

Aappaagu 2019-imi Kangaatsiap eqqaani saarullinnik uumatitsivimmiitsitanik tunisinerup aallartiaarnissaa anguniarlugu Royal Greenlandip maanna Namminersorlutik Oqartussanit akuersissummik piniarneq ingerlatilereerpaa.

Allattoq: Inga Egede, ineg@royalgreenland.com

Assit: Lukas Siegstad & Inga Egede

Asseq

 
 

Royal Greenland aperiguk

i
Write the text from the image