Polar Fish 2018-ip Sisimiut timersortarfiani septembarip 21-aniit 24-at ilanngullugu ingerlanneqarnerani orniguttunut tunisassianik nunatsinneersunik sassaalliisoqarsinnaasimanera Arctic Circle Bussinessimi pisortamit Juliane Henningsenimit usorsisimaarutigineqarpoq.

- Saqqummersitsinermut orniguttut nunatsinneersut aamma nunanit allaneersut kalaallit nerisassaataannik ooqattaagassaqartinnissaat kissaatigisimavarput. Aalisakkat qaleruallillu nunatsinneersut nutaaliorluni nerisassiarineqarsinnaanerat takutikkusussimavarput. Royal Greenlandi aalisakkanik qalerualinnillu aamma tunisassianik saqqummersitsinermi sassaalliutigineqartussanik tunissuteqarmat tamanna iluatsippoq, Juliane Henningsen oqarpoq.

Orniguttorpassuaqarpoq

Igasoq nutaaliorluni nerisassiortartoq Ilannguaq Hegelund aalisakkanik qalerualinnillu aamma tunisassianik soorlu uiluinnik mamarsaasikkanik, raajanik, saattuanik, saarullinnik pujuukkanik, kapisilinnik pujuukkanik, ammassannik, qaleralinnik, saarullinnik paningajattunik panertunillu, qeeqqanik issimi panertitanik, qullukkanik taamatuttaaq qaleralinnik mamarsaaserlugit tanitanik saqqummersitsinermi ulluni pingasuni ingerlanneqartumi canapéliaralugit sassaalliigaangat orniguttorpassuaqartarpoq.

- Ooqattaagassiat assigiinngitsut pingsut saqqummersitsinerup ulluni pingasuni ingerlanneqarnerani ullut tamaasa nalunaaquttap-akunnerni pingasupajaani sassaalliutigisarpakka. Saarulliit pujuukkat orniguttunit nunatsinneersunit ooqattaarumaneqarnerpaapput. Saarullinnik pujuukkanik tunisassiat nutaajupput aamma aalisakkanut pujuukkanut allanut sanilliullugit orsukinnerupput. Pujuukkat allat atorlugit nerisassiorneq misilittagaqarfigereeraluarpara, kisianni saarulliit pujuukkat atorlugit nerisassiorneq aatsaat misilikkakku misigisaq immikkut illuinnarpoq. Ammassaalli erlaviiakkat canapéliaralugit ooqattaagassiakka aamma ooqattaarumaneqarluarput, Ilannguaq Hegelund ooqattaagassianik alutornartunik mamarluinnartunillu Polar Fish 2018-imut orniguttunut nerisassiorlunilu sassaalliisussatut Arctic Circle Bussinessimit toqqarneqarsimasoq oqarpoq.

Julianne Henningsenip oqaatigaa, Ilannguup nunatta pissarititai ooqattaagassialiaminut ilaatigut aamma kusassaatigisimammagit aalisakkanik qalerualinnillu taamatuttaaq tunisassianik nutsinneersunik saqqummersitsinermi sassaalliisoqarnera orniguttunit alutorsaatigineqartoq.

- Isumaqarpunga aalisakkat qaleruallillu nunatsinneersut allatut tassa nutaaliorluni ooqattaagassiaralugit sassaalliutigineqarmata orniguttunit alutorsaatigineqarluartut. Ingammik orniguttut nunatsinneersut apeqqutigisarpaat pisarnermit allatut suliaralugit qanoq nerisassiarineqarsinnaanersut. Minnerunngitsumik Ilannguup ooqattaagissiani nunatta naasui, naasut akuutissat naatitallumi kusassaatitut akuutissatullu atorlugit sassaalliutigimmagit orniguttut alutorsarput. Ilannguarlu kusanarluinnartunik nerisassiornermik piginnaasaqarpoq, taamaammat sassaalliutigisai aamma illinnarluinnarput.

Sisimiuni Polar Fish 2018-ip ingerlanneqarnerani Arctic Circle Businessip aaqqissuussinerani assilisat allaaserisap ataani takuneqarsinnaapput.

Allattoq: Inga Egede, ineg@roaylgreenland.com

Assit: Arctic Circle Bussiness aamma Inga Egede

Asseq

 
 

Royal Greenland aperiguk

i
Write the text from the image