Royal Greenlandip kilisaatitaassaasa aappaata 2019-ip naalernerani naammassineqartussatut pilersaarutaasup atissaanik unammisitsineq sulisunit soqutigineqarluarpoq. Aqqit katillugit 84-it siunnersuutigineqarput, siunnersuuteqartullu ataasiakkaat qulit tungaannut qaangerlugilluunniit amerlassusilinnik siunnersuuteqartarput, taakkunannga aqqit ataasiakkaat siunnersuteqartunit ataasiakkaanit imminnut attuumassuteqanngitsunit siunnersuutigineqarlutik.

Ajugaasutut atsiunneqartoq Avataq tassaavoq qanga piniartut qaannamik umiamilluunniit pisaqarsimariarlutik pisaminnik kivitsaaliuillutik puttaqutitut atortagaat. Avataq ulloq manna tikillugu suli Avanersuarmi piniartunit qaannamik piniartillutik atorneqartarpoq.

Ajugaasuuppullu… Attumiut

Atsiisutut ajugaasuusup katillugit aqqit 13-it siunnersuutigai, unammisitsinermilu ajugaanerminik tusarlerneqarami oqaasissaaleqivoq.

- Asuki, naluaraluunniit qanoq oqassanerlunga, Tikkili Ezekiassen Attumi tunitsivimmi aqutsisuusoq illalaajutigaluni oqarpoq, nangipporlu:

- Qujanaqaaq, kisianni siunnersuusiortoq uangaannaannginnami. Suleqatikka katersoriarlugit qulingajaalluta isummersoqatigiilluta atissanik siunnersuusioqatigiippugut.

Atissarsiuussilluni unammisitsinermi ajugaasup kilisaatip atserneqarnissaani najuunnissaq akissarsiarissavaa, tamannalu 2019-ip naalernerani imaluunniit 2020-ip aallartilaarnerani Nuummi pissaaq.

- Kilisaatip sananeqarnerata naammassineqarnissaa 2019-ip naalernerani pisussatut pilersaarusiugaavoq, pilersaarullu malinneqassaaq, tassami kilisaatip tunniunneqarnissaa oktobarimi novembarimiluunniit naatsorsuutigaarput. Kilisaat Nuummi "angerlarsimaffeqassaaq", taamaammallu umiarsuaq Nuummi atserneqarlunilu nittarsaanneqassaaq, Lars Nielsen suliffeqarfissuarmi tunisassiornermi pisortaq oqarpoq.

Tuniniaanermi pisortat atissaanik aalajangiisuupput

Siusinnerusukkut atisssarsiuussilluni unammisitsineq nuna tamakkerlugu ingerlanneqartoq soqutigineqanngimmat suliffeqarfimmi unammisitsisoqarnissaa aalajangiunneqarpoq.

Atissarsiuussilluni unammisitsineq 2018-imi januaarip 19-ani naammassineqarmat siunnersuutit paasissaanngitsut allallu pimoorusserpalaanngitsut eqimattaliamit piiarneqarput. Immikkoortitereqqinnermi atissatut siunnersuutit qulingiluaannanngortinneqarput, taakkulu nassuiaaserlugit Royal Greenlandip nunarsuaq tamakkerlugu tuniniaasartutut Japanimi, Kinami, Tuluit Nunaanni, Kalaallit Nunaanni, Sverigemi aammalu Danmarkimi pisortaannut saqqummiunneqarput, atissamillu aalajangeeqquneqarlutik. Atissatut ajugaatinneqartoq 1-imiit 10-mut pointilersuinikkut nassaarineqarpoq, aqqit nuannarineqarneri ilutigalugit pointilersorneqarlutik.

Atissarsiuussilluni unammisitsineq tusarliunneqarmat kalaallisut atsiussisoqarsinnaanera aammalu siunnersuutigineqartut allamiunut taajuminartuunissaat kissaatigineqarpoq. Aqqit qulingiluat kiserngorussaasut tamarmik kalaallisoortuupput, aterlu Avataq piukkunnarnerpaatut nalilerneqarluni kilisaammut atsiunneqartussanngorpoq.

Kilisaatitaassaq Avataq tapertariissitsilluni raajarniutaallunilu qaleralinniutaasussaq 83 meterinik takissuseqarluni 18 meterinillu silissuseqarluni Royal Greenlandip kilisaataasa annersarilissavaat.

Allattoq: Káte Hansen, kaha@royalgreenland.com

Assit: RG aamma John David Eriksen

Asseq

 
 

Royal Greenland aperiguk

i
Write the text from the image