- Arctic Fish Greenland A/S-imi ineriartorneq naammagisimaarpara. Nuussuarmi Kullorsuarmilu aalisartut kiisalu Royal Greenland A/S peqatigalugit 2017-imi Arctic Fish Greenland A/S pilersikkatsiguli aalisartut annertunerusunik tunisisinnaanissat anguniarlugu aalisartut aalisarnerminni atortorissaarutaasa pitsanngorsaavigineqarnissat anguniarsimavarput taamatuttaaq tunisassiorfimmi atortorissaarutit pitsanngorsaaviginiarlugit sulissuteqarsimalluta. Naak suli aalisarnermi tunisassiornermilu pitsanngorsaataasinnaasunik suli allanik anguniagassaqaraluarluta, mannamut angusavut naammagisimaarnarput, taama oqarpoq Kullorsuarmi aalisartut piniartullu peqatigiiffianni APPK-mi siulittaasoq aamma Arctic Fish Greenland A/S-imi piginneqataasoq, Themothæus Petersen.

Ukiup ingerlanerani containerit qerititsiviutigisut nutaat 40 fodsitut angissusillit qulit Kullorsuarni tunisassiorfimmi ikkussuunneqarput, sapaatillu akunnerata tulliani containerit sisimat allat nutaat ikkussuuneqarlutik atuutilertinneqassapput. Aalisartut umiatsiaarasortut 60-it missingi Kullorsuarni Arctic Fish Greenland A/S-ip tunisassiorfianut tunisisarput. Aasaanerani inuit qulit tunisassiorfimmi sulisorineqarput ukiuuneranilu sulisut 15- 20 akornanni amerlassusillit sulisorineqartarlutik.

- Sapaatip akunnerata tulliani containerit sisamat ikkussuunneqareerlutik atuutilissapput, taamaattumik siunissaq eqqarsaatigalugu isumalluarpunga. Ilaatigut tunisassiorfimmi qerinasuartitsiviit malinnaasinnaajunnaarnerannik aamma aalisarnermi atortutta taartissaanik utaqqisariaqartartarnerit, kiisalu Royal Arctic Linep assartuiniartarneranik ajornartorisuteqartarnerit pissutigalugit suli aporfeqartaraluarluta tunisassiorfimmi tunisassiorneq siuariartorpoq, tamannalu nunaqarfimmi inuuniarnikkut pitsaasumik sunniuteqarpoq, aalisartut isertitaqarnerulernerisigut nunaqarfitsinni inuuniarneq oqinnerulermat.

Aasaanerani tunisipput

Siornatigut Kullorsuarmi tunisassiorfik aasaanerani matoqqasarsimasoq aasaq manna aalisartut tunitsivigaat. Tunisassiorfiup qerititsivia nunaqarfimmi aalisartut ukiuunerani tunisaannik majimi ulikkaarneqarsimasoq imaarneqareermat aalisartut aasaanerani aalisarnertik ingerlateqqissinnaasimavaat.

- Majimi aalisarneq ingerlallualeruttortoq qerititsiviit ulikkaarput, kisiannili imaarneqareerneranni aalisarnerput nangissinnaasimavarput nunaqarfinnullu allanut tunisinata nunaqarfitsinni tunisisisarpugut. Aasaanerani tunisassiorfiup ammanera allannguutit pitsaasut ilagaat. Aalisarnitsinni ilaatigut neqitassanik amigaateqartanngitsuugutta aamma tunisassiorfimmi assigiinngitsunik aporfeqarluta tunisisinnaajunnaartarsimanngitsuugutta tonsit 15-it 20-illu akornanni annertunerusunik uanga tunisisimasinnaagaluarlunga ilimagaara, Themothæus Petersen, Arctic Fish Greenland A/S-ip tunisassiorfiani ineriikkanik tunisassiorsinnaalernissamik kissaateqartoq oqarpoq.

- Nunaqarfitsinni suliffissaqartitsinerulernissaq anguniarlugu tunisassiorfitsinni ineriikkanik assigiinngitsunik tunisassiorsinnaalernisssarput anguniagaraarput. Siorna aallartinnitsinniit maannamut angusaqaqaagut, taamaattumik tunisassiornerup aamma aalisartut tulaassaannik angummmasinnaalluni tunisassiorfiup tunisassiorsinnaalernissaa anguniararaarput. Taamaattumik ukiut marluk pingasulluunniit ingerlanerini ineriikkanik tunisassiorsinnaaneq, aalisarnermi atortunik pitsaanngorsaanerit minnerunngitsumillu tunisassiorfimmi qerinasuartitsivimmik pisaarsimanissarput neriuutigaara.

Kullorsuaq juulip allaqqaataani 2018-imi 439-inik innnuttaqartoq nunatsinni nunaqarfiit inuttunersaraat.

Allattoq: Inga Egede, ineg@royalgreenland.com

Assit: Frederik Olsen

Asseq

 
 

Royal Greenland aperiguk

i
Write the text from the image