Royal Greenlandip ukiut tamaasa pikkorinnerpaani timersortartumut tapersiinissaminut aningaasanik immikkoortitsisarpoq, tapiissuteqartarnermik ataatsimiititaliallu sangusaarluni sisorartartoq Nuunu Chemnitz Berthelsen tapiissuteqarfigissallugu toqqarpaat. Ataatsimiititaliap sisorartartumut 23-nik ukiulimmut checki 25.000 koruuninik nalilik pingasunngornermi decembarip 18-iani tunniuppaat.

- Nuunu 2022-mi Beijingimi Kinamiittumi OL-ertoqarnissaanut anngunniarluni siunissaq ungasinnerusoq eqqarsaatigalugu anguniagaqarpoq, anngunnissaanullu tapersersorusupparput. Inuusukkaluarluni nunanit tamalaanit sisorartartut anngunniullutik unamminerini, aamma FIS-inik taaneqartartuni, 2011-imili peqataasalerpoq. Peqataasarnermini marlussoriarluni ajugaanikuuvoq 2019-imilu inersimasut nunarsuaq tamakkerlugu pissartanngorniuunneranni normu 36-nngornera inissisimaffiani pitsaanerpaavoq, tapiissuteqartarnermik ataatsimiititaliaq taamak tunngavilersuivoq.

Nuunu Chemnitz Berthelsen ulluinnarni Italiami najugaqartoq sisorartartoqatigiit ilagalugit sapaatip-akunneranut tallimariarluni arfinileriarluniluunniit sungiusartarpoq. Nuummi peroriartorpoq sisorartartuuneralu siusissumi NS-84-ikkunni aallartippoq.
- Meeraagallaramali unammersuaartartoorusullunga nalunngilara. Unammersuaartartuuniarumalu sisorartartut ilinniarnertuunngorniarfianni atuartariaqarama angorusutara anguniarlugu ukiuni sisamani Norgemi najugaqarpunga, Nuunu tapersiissutinik tunineqareerami nuannaarluni oqaluttuarpoq.

Nuunu ukioq manna marsip qaammataani ajoquserami seeqquminillu suliaritittariaqarsimagami qaammatini arfineq-pingasuni sungiusaqqittariaqarsimavoq. Maanna Italiamukaqqittussanngorpoq.

- Ukiup nutaap aallartilaarnerani aallassaanga, sisorartaleqqinnissaralu qilanaaraara. Tapersiissutit atorlugit qasujaallisaanermut immikkut siungiusaasoqalersinnaallungalu sisoraatikka pitsaanerusunik taarsersinnaanngorpakka. Sisorartartuuneq timersuut akisuujuvoq, taamaammat Royal Greenlandip tapersersuinera nuannaarutigisorujussuuara. Qujanarujussuaq, Nuunu Chemnitz Berthelsen naggasiivoq.

Royal Greenlandip Nuunu Chemnitz Berthelsen anguniagaqarluni ilungersornerani ajunnginnerpaamik kissaappaa.

Asseq

 
 

Royal Greenland aperiguk

i
Write the text from the image