Saattuni tunisassiorfik annertuumik iluarsartuunneqareerluni 2018-imi novemberip naalernerani ammaqqippoq. Tunisassiorfimmi sulisut mikisunik atuartunik meerallit sulinerisa nalaanni paaqqinnittarfiusup kommunimit ingerlanneqartup 2018-imi ukiakkut matunerata kingorna tunisassiorfimmi sulisut meeqqaminnik paarsissussaaleqinerat pissutigalugu Saattuni tunisassiorfik ammaqqereernermi kingorna sulisunik amigaateqalerpoq.

Saattuni tunisassiorfimmi sulisut meeqqaminnik paarsisussaaleqinerat aqqiiviginiarlugu 2019-imi januarip 14-iani Royal Greenlandi meeqqanik paarsisumik atorfinititsivoq.

- Sulisussaqarniarnerput eqqarsaatigalugu tamanna iluaqutaavoq, kisinnili sulisunik takkutinngitsoortoqartillugu suli sulisussaaleqisarpugut. Sulisut arfinillit qulillu akornanni amerlassusillit ilaannkkut amigaatigisarpagut, taama oqarpoq Royal Greenlandip Saattuni tunisassiorfiani ingerlatsisoq, Marie Knudsen.

Aalisartut tunisinnaasaat annertusipput

Saattuni tunisassiorfiup iluarsartuunneqareernerani tunisassianik uninngasuusivik marloriaammik annertunerusunik uninngasuuteqarsinnaalerpoq taamatuttaaq aalisakkanik immikoortiterivik nutaaq aamma qerinasuartitsiviit marluk ikkussuunneqarmata, kiisalu tunisassiornermi ingerlaarfiit nutarterneqarmata tunisassiorneq eqaannerusumik ingerlalermat Saattuni aalisartut 60-it 70-illu akornani amerlassuseqartut siornatigoorniit pingasoriaammik annertunerusunik qaleralinnik tunisisinnaanngorput.

Saattuni tunisassiorfimmi sulisut 20-iupput, taakkunannga 17-it qaleralinnik niaquikkanik paperuikkanik qaleralinnillu ilivitsunik tunisassiorlutik suliaqarput.

- Tunisassiorfimmi aalisakkanik annertunerusunik tunisassiorsinnnaalernikuuvugut, ilutigalugu sulisunik arfinillit qulillu akornanni amerlassusilinnik amigaateqartilluta allatut ajornartumik ilaannikkut tunisassiassanik suliarineqanngitsunik Ukkusissanut Uummannamullu assartuisariaqartarpugut, Marie Knudsen oqarpoq.

Saattuni tunisassiorfimmi sulisussaaleqineq aaqqiiviginiarlugu sulisut avataaniit tikittut inissaannik Royal Greenland Saattuni illumik sanaartortitsiniartoq, Royal Greenlandimi tunisassialerinermik ingerlatsisup Niels Ole Møllerip paasissutissiissutigaa.

- Sulisut avataaniit tikittut inissaannik Saattuni sanaartotoqarnissaa isumalluarfigeqaara. Neriuppunga siunissami sulisut holdit marluk sulisorilersinnaajumaarlutigit, taama oqarpoq Marie Knudsen.

Saattuni tunisassiorfimmi sulisut avataaniit tikittut inissaat inunnit arfineq pingasunit ineqarfigineqarsinnaasup sanaartorneqarnera 2019-imi upernaakkut aallartissaaq.

Saattut 242-inik inoqarpoq.

Allattoq: Inga Egede, ineg@royalgreenland.com

Assit: Marie Knudsen

Asseq

 
 

Royal Greenland aperiguk

i
Write the text from the image