Unnuk Kultorisiorfimmi katillugit inuit 2350-it missingi Royal Greenlandimi pisoqarfiusunut alakkaapput.

Inuit pisuni peqataapput

Royal Greenlandip Unnuk Kulturisiortitsinerani pisoqarfiusuni assigiinngitsuni pingasuni nalunaaqutaq 15:00 matut ammarmata ilaqutariit meerartallit, aappariit ikinngutigiijaallu alakkaakkamik Royal Greenlandimi sulisut aaqqissuussaanni susassaqarfinni assigiinngitsorpassuarni peqataapput.

Inuit 615-it misingisa Royal Greenlandip nuummi tunisassiorfia alakkarpaat. Tassani meeqqat inersimasullu assigiinngitsunik pinnguaatinik pinnguaqataapput aamma qalerallit quaannik kiisalu saarullinnik issimit panertitanik ussiipput. Inersimasut kaageeralerlugit kaffisuupput tiituulllutillunniit meeqqallu saftituullutik pisoqarfinni allani kilisaammi Tuugaalimmi imaluunniit qullersaqarfimmi pisunut alakkaannginnerminni.

Qullersaqarfiup saaffiginnittarfiani Royal Greenlandimi sulisoqarnermut immikkoortortaqarfimmi sulisut tikilluaqqusillutik ilinniarfiusinnaasut pillugit quppersakkanik agguaassipput inimilu saniani kilisaatini inuttaqarnermut immikkoortortaqarfimmi sulisut Royal Greenlandip kilisaataataani officeritut ilinniarsinnaanermut tunngasumik imaqartumik aamma 2019-ip ingerlanerani singinneqartussat kilisaatit nutaat marluk, Sisimiut aamma Avataq pillugit videonik isiginnaartitsipput.

Qullersaqarfiup nerisarfiani igasup nerisassiai, Sea Dogs aamma aalisakkanik suppaliaq inunnit isaasunit kajungerineqaqalutik mamarineqaqaat. Inuit nerrinneranni inuusuttut piginnaaneqarluartut marluk, Renè Brandt Løvstrøm aamma Kaaleeraq Kristoffersen guitarerlutik erinarsorlutillu aliikkusersuipput. Inuit 300-it missingi Tip 13-imi immersuipput inuillu 100-it missingi raajanik qalipaajaallaqqinneqqusaallutik unammeqataapput. Meeqqat mikisut 50-it missingisa kiinnatik qalipatsippaat anginerumaallu titartaallutik unammeqataallutik.

Inuit 725-it kilisaat Tuugaalik alakkarpaat, tassani igasoq qaleralilaallerpoq. Pulaartut kilisaatip aquttafia lastialu takornariareeramikku nerisarfimmi tiituullutik kaffisuutigalutiluunniit Tip 13-imik immersuinissartik periarfissaqarfigaat.

Royal Greenlandimi Unnuk Kulturisiorfimmi pisoqarfiit nalunaaqutaq 19:00 tungaanut ingerlapput.

Royal Greenlandimi Unnuk Kulurisiortitsisoqarnerani assit allaaserisap ataani takuneqarsinnaapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image