Royal Greenlandi raajanik pisisartunut igaffissuaqarfinnullu tunisassianik ukiorpassuarni Danmarkimi Aalborgimi illuutini attartukkani poortuisitsisarsimavoq. Illuutinik attartorneq 2019-ip naaneranut killeqarpoq taamaammallu suliffeqarfimmi siunissami iliuuserineqarsinnaasunik piffissami sivisujaami ujartuisoqarsimavoq. Assartugalerinikkut allaffissornikkullu pisariillisaanissaq aammalu appasinnerusunik aningaasartuuteqarlernissaq qulakkeerumalugu Aalborgimi maannakkut tunisassiorfiusoq Cuxhavenimi tunisassiorfioreersunut nuunneqarnissaa aalajangerneqarpoq.

Nuussiniarnermi sulisut suliffimminnik annaasaqartussat siunissami tunngavigissaartinneqarnissaat pingaartinneqarpoq. Nuussiniarnerup nalaani sulisut sulisoriinnarnissaannut suliunnaarnissaannullu isumaqatigiissusiornissaq sulisut suleqatigalugit isumaginiarneqarpoq. Taamatuttaaq sulisut Cuxhavenimi utaqqiisaagallartumik ataavartumilluunniit sulisorineqarsinnaanerat oqaloqatigiissutigineqassaaq.

- Langerakimi sulisut misilittagaqarluarlutillu pikorissuusut pisariitsumik nuuttoqarnissaanut tunisassiornermillu ingerlatitseqqinnissamut peqataalluarsinnaapput. Taamaattumik neriuutigaarput sulisut peqatigalugit piffissami pisussami suleqatigiilluarnissatsinnut tunngavissarsiorniarpugut, Niels Kinnerup aningaasaqarnermut pisortaq oqarpoq.

Royal Greenlandip Danmarkimi Aalborgip kangiani poortuisarfiata 50-it missaannik sulisoqarlunilu taartaasartullip saniatigut Aalborgip kujataani Svenstrupimi allaffeqarfeqarpoq. Tassani ilaatigut nunarsuup sinneranut tuniniaaneq, assartugalerineq, nittarsaassineq aammalu aningaasarsiornermut tunngasut isumagineqarput. Tunisassiornerup Langerakimit nuunneqarnissaa Royal Greenlandip Svenstrupimi allaffeqarfianut sunniuteqassanngilaq.

Annertunerusumik paasisaqarusuttut aningaasaqarnermut pisortaq Nils Kinnerup mobilnormuanut +45 20407875-imut attavigisinnaavaat.

Asseq

 
 

Royal Greenland aperiguk

i
Write the text from the image