-Naammassillugu ilorrisimaarnaqaaq, 1. gradimik angallammi naalakkatut ilinniakkaminik naammasseqqammisoq, Andreas Tidemand oqarpoq.

Andreas Tidemandip Skagen Skipperskolemi 1. gradimik angallammi naalakkatut soraarummeersimanermut uppernarsaatini 2019-imi juunip 21-ani tiguaa. Ilinniagaq 2018-imi januaarimi aallartippaa. Angallammi naalaganngorlaarli siunissamut pilersaarusiulereerpoq:

-Juulip naanerani umiarsuarmi naalakkatut ilinnialeqqissaanga, umiarsuullu naalagaatut ilinniarneq ukioq ataatsimik sivisussuseqakkajuppoq, Andreas Tidemand oqarpoq.
Imarsiulerniaraanni 1. gradimik angallammi naalakkatut allagartaqarneq inatsisitigut piumasaqaatitut naammakkaluarpoq, Andreasili umiarsuami naalakkatut ilinniarnikkut aqutsinermik, aningaasaqarnermik imarsiornermilu umiarsualerinermik ilisimasaqarnerungaatsialissalluni isumaqarpoq.

Imarsiortilluni soraarummeerutissani allappaa

Andreas ilinniaatigaluni imarsiorpoq, taamaammallu piffissami sivisuumi ilaquttani qimaqqasimavai. Ilaquttat qimaqqanerat ilungersunaraluartoq imarsiortilluni pigaartuunngikkallarfimmini aamma allattariarsortarsimanera unammillernarsimavoq.

 -Soraarummeerama angusakka kusanartut nuannaarutigaakka, imarsiuleqqinnissannullu piareersimavunga, Andreas Tidemand oqarpoq.

Andreas Tidemandip ilinniagaq suugaluarpalluunniit ilinniakkamik aallartitsisartut amerlanerunissaat kissaatigaa:

- Aqumiut, angallammi naalakkat, mistalit, fiskeriteknologit allallu arlalippassuit suli amigaatigaavut.  Ilinniakkamik aallartitsinissamut kingusinaartoqanngisaannarpoq, Andreas Tidemand oqarpoq.

Andreas Tidemand maanna Royal Greenlandip kilisaataataani nutaaliami, Sisimiut-mi, aqumiussatut sulilissaaq.

Allattoq: Inuuteq Kriegel, inkr@royalgreenland.com

Assi: Nammineq pigisaq

Asseq

 
 

Royal Greenland aperiguk

i
Write the text from the image