- Suliffimma saniatigut kajumissutsimik ikiuullunga - qatserisartut kajumissutsimillu ikiuullutik nunap ikuallattup qatserniarneqarnerani ulloq unnuarlu suleqataasut nerisassaannik - katersuinermik suliaqarama Royal Greenlandip taakku nerisassaannik aatsisoqarnissaanut aaqqissueqataanikkut ikiuulluni ajunngisaarnera nuannaarutigisorujussuuara, 59-inik ukiulik Aagga Storch Sisimiuneersoq oqarpoq.

Ilatsiinnarsinnaasimanngilaq

Aagga Storch qatserisartunik; arnamik angummillu Sisimiuni nunap ikuallattup qatserniarneqarnerani ikiuullutik suleqataasunik qatannguteqartoq allat ikiuunnissaminnut iliuuseqarnissaannut ilatsinnaarsinnaasimananilu utaqqiinnarsinnaasimanngilaq. Taamaammat Royal Greenlandip Nuummi qullersaqarfiani pisortat ilaata attavigineratigut qatserisartut kajumissutsimillu ikiuullutik Sisimiuni nunap ikuallattup qatserniarneqarnerani ullorpassuarni kingullerni suleqataasut nerisassaannik aatsisoqartarnissaata iluatsinnissaata qulakkeerneqarnissaanut ikioqquvoq.

- Sisimiuni qatserisartoqarfimmut saaffiginneqqaarnikkut imminut neruuppunga. Tamatuma kingorna Facebook aqqutigalugu nerisassanik katersuiniarlunga aallartippunga. Tamatumunnga atatillugu Royal Greenlandip Nuummi qullersaqarfiani pisortat ilaat attavigaara, taassumalu noqqaassutiga ajunngisaarluni akueraa, sandwichinillu raajanik qalipaajakkanik akusanik aatsisoqartarnissaanut ikiuunnissaminut neqeroorpoq, Aagga Storch qatserisartunut tamaviaarlutik sulisunut ikiuussinnaanerminut qujamasuttoq oqarpoq.

Taamatuttaaq Royal Greenlandip Sisimiuni tunisassiorfiani sulisut sisamat - qatserisartut kajumissutsimillu ikiuullutik nunap ikuallattup qatserniarneqarnerani suleqataasut - nerisassaannik imeruersaatissaannillu assartuinermi kajumissutsimik ikiuunnissaminnut aalajangerput.

- Qatserisartut igaffimmiullu kajumissutsimik ikiuunnikkut suleqataajartortussat katillugit quliusut Royal Greenlandip umiatsiaanik “Aqqaluk”-mik nunap ikuallattup eqqaanukaappavut. Marloriarlutalu angallassinitsinni sandwichit, sodavandit, imeq, sukkulaatit kaageeqqallu qatserisartut kajumissutsimillu ikiuullutik suleqataapiloortut pissaat - Royal Greenlandimit tunissutigineqartut – usigaavut, Royal Greenlandip Sisimiuni tunisassiorfiani key-useri Finn Lynge Frederiksen oqarpoq.

Allattoq: Inga Egede, ineg@royalgreenland.com

Assit: Finn Lynge Frederiksen aamma Aagga Storch

Asseq

 
 

Royal Greenland aperiguk

i
Write the text from the image