Royal Greenlandimi pisortaaneq Mikael Thinghuus kilisaatitaap atserneqannginnerani qaaqqusanik tikilluaqqusinermini oqarpoq, Royal Greenlandip kilisaatitaava kilisaataataani nutaanerpaajullunilu nutaaliaanerpaajusoq”, taannalu Anja Evaldsenimit Royal Greenlandip qullersaqarfiani Nuummiittumi siornatigut ilinniartuusimasumit akissarsialerivimmilu maanna atorfeqartumit atserneqarpoq.

Kilisaatitaaq Royal Greenlandip kilisaataataani Sisimiut-mik atserneqartuni pingajuusoq 5000 bruttotonsinik utsertussuseqarmat siulianut tunineqareersumut sanilliullugu marloriaammik angineruvoq.

Kilisaataataani nutaaliaanerpaavoq

Mikael Thinghuusip oqalugiarnermini ilaatigut oqaatigaa, Royal Greenlandi kilisaatitaap Sisimiut-p Kalaallit Nunaannut tikinnera Nuummi pisortatigoortumik atserneratigut nalliuttorsiutigineqarnissaanut aalajangiisuusoq.

- Royal Greenlandip kilisaatitaava kilisaataataanilu nutaanerpaajusoq, anginerpaajusoq nutaalianerpaajusorlu tikilluaqquniarlugu atserniarlugulu ullumikkut katersuuppugut, Mikael Thinghuus ilaatigut taama oqarpoq, nangipporlu:

- Nuummiittuususi tamassi kilisaatitaatta tikinnerata atserneqarneratalu Royal Greenlandip Nuummi qullersaqarfiata eqqaani nalliuttorsiutigineqarnerani peqatigerusussimavatsigit. Taamaattumik tamanna kilisaatitaap Sisimiut-p tassuugu pisortatigoortumik atserneqarnissaata nalliuttorsiutigineqarnissaa sioqqullugu ilisimatitsissutigisimavarput.

Royal Greenlandip pisortaanerata qaaqqusanut tulluusimaarpalulluni oqalugiarnermini oqaatigaa, kilisaatitaap Sisimiut-p kilisaatinut allanut sanilliullugu qerinasuartitsinerusinnaanera sukkaneruneralu orsussamik atuinerusalernissatsinnik kinguneqarnavianngitsoq, teknikkikkullu atortui nutaaliaanerpaajusut aalisagartanik tamakkiisumik tunisassiortalernissatsinnut tunngaviusinnaasut.

- Ataatsimut isigalugu piujuartitsineq tunngavigalugu ingerlatsineq avatangiisinillu eriaginninneq pingaartittorujussuunerisigut kilisaatitaarput Sisimiut tunisassiassanik atuilluarnissaanut naleqqussarlugu ilusilersugaavoq. Taanna aalisakkat sinnikuinik qajuusiorfittaqarmat aalisakkallu orsuanik tunisassiorfittaqarmat aalisagaq tamakkiisumik atorlugu tunisassiornermik aallussiffiusinnaavoq. Tassa imaappoq, tunisassiat sinnikuinik eqqaanerit tassani pisassanngillat, Mikael Thinghuus oqarpoq.

Piujuartitsineq tunngavigalugu ingerlatsineq annertusineqassaaq

Minnerunngitsumillu kilisaatitaarput Kalaallit Nunaanni aalisarnerup ingerlarngata sutigut tamatigut pitsanngorsaavigineqarnissaanut piujuartitsinerlu tunngavigalugu ingerlatsinerup annertusinissaanut iluaqutaajumaartoq Mikael Thinghuusimit pingaarnertut erseqqissaatigineqarpoq.

- Royal Greenlandip Kalaallit Nunaata inuinit 56.000-iusunit pigineqarnera eqqarsaatigalugu Kalaallit Nunaanni aalisarnerup ingerlarnganut iluaqutaasussamik nutaamik kilisaatiliortitsinermut aningaasaliissuteqarnerput usorsisimaarutigisorujussuuarput. Aningaasaliissuteqarnerput aalisarnerup ingerlarnganik sutigut tamatigut pitsanngorsaanermut iluaqutaassaaq, tamannalu ilutigalugu piujuartitsineq tunngavigalugu ingerlatsineq annertusineqassalluni, Mikael Thinghuus qaaqqusat Sisimiut-mut takornariarnissaannut tikilluaqqusinnginnermini taama oqarpoq.

- Kilisaatitaatta sananeqarneranut atatillugu pilersuisut suleqatillu Kalaallit Nunaanneersut Kalaallit Nunaatalu avataaneersut tamaasa qutsavigaakka.

Pisortatigoortumik atserneqarnerata nalliuttorsiutigineqarnera ullumi pingasunngornermi ualikkut ataasimiit pingasut tungaannut pimmat qaaqqusat; ilaatigut Naalakkersuisuni Inatsisartunilu ilaasortat, Kommuneqarfik Sermersuumi kommunalbestyrelsimi ilaasortat inutsialaallu allat peqataapput. Nuummi innuttaasut kikkulluunniit kilisaatitaami inuttanit ualikkut pingasuniit tallimat tungaannut tikilluaqquneqarput.

Kilisaatitaap atserneqarnerani assilisat ataani takuneqarsinnaapput.

Allattoq: Inga Egede, ineg@royalgreenland.com

Assit: Inuuteq Kriegel, inkr@roralgreenland.com

Asseq

 
 

Royal Greenland aperiguk

i
Write the text from the image