Kilisaat Nuummut tulatsinnani Tunumi Kitaanilu aalisarpoq, Royal Greenlandip kilisaataatigiligaani kingulleq nutaaliaasorlu aalisarnermini qaleralinniarpoq.

Kilisaammi inuttat 42-t inissaqarput, maannali inuttat 34-t ilaapput. Inuttanut ilaavoq Kâpe Lange, ukiut 39-t ingerlanerini Royal Greenlandip kilisaataataani Sisimiuni pingasuni inuttaasareersoq.

- Kilisaatip nutaaliaasup matuma qaavani allannguisoqangaatsiarpoq. Suna tamarmi sukkanerullunilu ajornannginneruvoq. Kilisaammi siullermi sulinermi piffissaq atorneqartartoq maanna affaannanngortipparput, Kâpe Lange oqaluttuarpoq, nangipporlu:

- 1980-imi kilisaammut Sisimiumut siullermut ikivunga 1997-imilu tullianut ikillunga, tassani ukiut 22-t sulivunga. Maanna pingajuaniippunga, kilisaammi aalisartutoqaq Kâpe Lange oqaluttuarpoq.

Kilisaatitaaq najoruminartumik angerlarsimaffippalaartumillu isersimaartarfeqarpoq, timigissartarfeqarluni, sulinnginnermilu sammisassaqarnissamut periarfissagissaarneroqaaq.

- Isersimaartarfeqalerluni iluarusunnaqaaq. Siullermik ataatsimut isersimaartarfeqanngilagut, maannalu isersimaartarfeqarnera iluarneroqaaq.

Umiarsuup naalagaa nuannaartoq

Sisimiup nutaap naalagaa, Ivan Olsen, 1988-imili Royal Greenlandimi sulilerpoq. Kilisaatinik aalisarnermi assigiinngitsunik atorfeqartarnikuuvoq, Sisimiullu siuliani aamma umiarsuup naalagaatut atorfeqarsimavoq.

- Angineruvoq nutaajullunilu. Nutaatut tipeqarpoq. Soorlu nutaamik biilisisimalluni, misigissuseq taamatulli nuannertigivoq, umiarsuup naalagaa nuannaartoq oqaluttuarpoq.

Kilisaatitaaq silinnerullunilu angineruvoq, tunisassiorfikkaanerullunilu imaqqortunerusoq.

- Umiarsuarujussuuvoq, aqukkuminarporli. Sutigut tamatigut ajornannginneruvoq, umiarsuup naalagaa Ivan Olsen oqaluttuarpoq.

Kilisaatitaaq pillugu uani atuarlutillu isiginnaarit: 

https://www.royalgreenland.gl/kl/Aalisarneq/Kilisaatit/Mtr-Sisimiut---Paasissutissat

Allattoq assiliisorlu: Inuuteq Krigel, inkr@royalgreenland.com

Asseq

 
 

Royal Greenland aperiguk

i
Write the text from the image