Royal Greenlandip Maniitsumi tunisassiorfiani ingerlatsisoq Susanne Marie Olsen taama oqarpoq.

Isumannaallisaaneq eqqarsaatigalugu inuit susassaqanngitsut talittarfiup eqqaatigooqqusaannginnerat innuttaasunut ersersikkumallugu Royal Greenlandip Maniitsumi tunisassiorfia talittarfimmi tunisassiorfiup eqqaaniittumittumi mianersoqqussutinik allagartalersuillunilu aqqummut assiaqutsersuivoq.

- Inuit susassaqanngitsut tunisassiorfiup eqqaatigooqqusaanngillat. Tunisassiorfiup eqqaa ulorianartunik suliaqarfiusarmmat Sullivinnik Nakkutilliisoqarfiup innersuussinera malillugu mianersoqqussutinik allagartalersuillutalu aqqummut assiaqutsersuivugut talittarfiup eqqaani ajutoornissat ingalassimaniarlugit, Susanne Marie Olsen oqarpoq.

Talittarfik aserfallassimasoq

Tunisassiorfiup eqqaa truckinik ingerlatsiffiusarmat kranillu atorlugit suliaqarfiusarmat tunisassiorfiup eqqaatigoorneq ulorianarpoq.

Talittarfik tunisassiorfiup eqqaaniittoq aserfallassimasoq tunisassiorfimmi sulisunit ulluinnarni suliaqarfiusartoq truckinik ingerlatsiffiusarlunilu kranit atorlugit suliaqarfiusarpoq. Taamatuttaaq aalisarnermut atortorpaalunnik aalisartunit aaneqariaannanngorlugit tunisassiorfimmi sulisunit isumagineqartartunik tunisassiorfiup eqqaaniittoqarmat kaarersuit qaleriissakkat tunisassiorfiup eqqaaniipput. Tamatuma saniatigut saarullinnik uumatitsivimmiitanik akunnittarfiit imaaniititat talittarfiup isuani inissisimapput.

Tulaassuisartuvut pilertortumik peqqissaartumillu sullittartussaagatsigit truckillu assartugassanik oqimaatsunik assartuutaasarmata mianersuaalliullatsiarneq allaat toqumik kinguneqarsinnaasumik aqqunarujussuartoqarneranik malitseqarsinnaavoq, tunisassiorfimmi ingerlatsisoq oqarpoq, taassumalu Maniitsumi innuttaasut talittarfimmi Royal Greenlandip tunisassiorfiata eqqaaniittumi allagartanut mianersoqqussutinut ataqinneqquai.

- Allagartat mianersoqqussutit aqqummullu assiaqutsersuinerit tunisassiorfiup eqqaanittumi talittarfimmiittut ataqqilaarisigit.

Tamatumunnga atatillugu atuartut anginerit aammali innuttaasut allat ingammik unnukkut unnuakkullu talittarfiup eqqaatigoortarmata tunisassiorfimmi ingerlatsisoq paasissutissanik Maniitsumi atuarfimmut ingerlateqqitassanik suliaqarpoq.

Allaaserisap ataani Maniitsumi talittarfimmi mianersoqqussutit aqqummullu assiaqutersuinerit assilineri takuneqarsinnaapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image