- Umiarsuaq uumatitsiviutigisoq “ Maniitsoq”-ip majip aappaanni saarulliit uumasut siulliit Atammiup eqqaanut aavai. Kingorna saarulliit uumasut assigiinngitsunik annertussusillit Atammiup Maniitsullu eqqaani aaneqareerput. Maanna aamma Kangaatsiap eqqaani aalisartut arlallit “Maniitsoq”-ip saarullinnik uumasunik aallersinnaaneranik nalunaaruteqareerput, taama oqarpoq Royal Greenlandimi aalisartunut siunnersorti, Lauritz Kreutzmann.

Maniitsumi, Atammimmi, Napasumi, Kangaamiuni, Kangaatsiami Sisimiunilu aalisartut maannamut uumatitsivinnik tunineqareersimalerput. Saarulliit bundgarninik pisat aalisarfimmi uumatiinnarlugit uumatitsivinnut nussorneqartarput. Kingorna umiarsuup uumatisiviutigisup Manitsup saarulliit uumasut Maniitsumi Royal Greenlandip tunisassiorfianut assartortarpai, tassanilu saarulliit nerpigilluinnartut Nutaaq Cod-itut tunisassiarineqartarput.

- Uumatitsiviit 157-it pigaavut mannamullu 133-it aalisartunut tunniunneqareerput. Kujataani Atammimmiit avannaani Qeqertarsuaq tikillugu aalisartut ukioq manna saarullinnik uumasunik aalisarnermi peqataasinnaanerannik akuersissummik pinikuuvugut. Sumiiffinni pineqartuni saarullinnik uumasunik aalisarnermi aalisartut peqataarusuttunut uumatitsivinnik tunniussisinnaasatinnik suli peqarpugut, Lauritz Kreutzmann oqarpoq.

Saarulliit mikinerupput

Umiarsuaq uumatitsiviutigisoq Maniitsoq ukioq manna siornarniit ullunik qulinik siusinnerusukkut saarullinnik uumasunik aallertoq, aamma siorna piffissap taamaalineranut naleqqiullugu ukioq manna saarulliit mikinerusut Lauritz Kreutzmannip oqaatigaa.

- Ukioq manna saarulliit tunineqartut siornamut naleqqiullugui annikinnerupput. Aalisartut oqarput ammassaat suli sineriammiilinngimmata saarulliit aamma suli takkutinngitsut, Lauritz Kreutzmann nassuiaavoq, nangipporlu:

- Kisianni uagut saarullinnik uumatitiviniitsitanik tunisassiornissatsinnut piareersimavugut, aamma saarullinnik annertunerusunik tunisisoqartaleriarpat sulisut paarlagaattut arlalinngorlugit tunisassiornissatsinnut piareersimavugut.

Saarulliit bundgarninik pisarineqarnikut uumatiinnarlugit Maniitsumi Royal Greenlandip tunisassiorfianut assartorneqartinnagit saarulliit ullut 14-it tikillugit uumatitsivinni uumatinneqarsinnaapput.

Allattoq assiliisorlu: Inga Egede, ineg@royalgreenland.com

Asseq

 
 

Royal Greenland aperiguk

i
Write the text from the image