Ane Sofie Frederiksen Sisimiuneersuusoq 2018-imi septemberimili Hawaimi tuluit oqaasiinik pikkorissarluni Ef International Language Cambus Honolulumi nunat tamalaaneersut oqaatsinik pikkorissartut ilinniarfianni qaffasissumik tuluttut ilinniagaqarpoq.

Ane Sofie Frederiksen 2019-imi upernaap tungaanut Hawaimiittussaq oqarpoq oqaatsinik pikkorissarfimmi angusarissaassagaanni ilinniagassalerisarneq aamma atuartitsinermi malinnaalluarneq pingaaruteqartoq.

- Tuluttut oqaasilerinermi angusarissaarnera tulluusimaarutigeqaara. Pikkorissarnitsinni tuluttut ilikkagassat qaffasinnerusut anguniarlugit sapaatit akunnerit tallimakkaarlugit misilitsittarpugut. Ilinnigassat assigiinngitsunik qaffasissuseqarput, tassalu A-miit C-imut, C qaffasinnerpaalluni. Maannkkut tuluttut atuartitsissutini qaffasinnerpaami C.2.1-imi pikkorissarpunga, taama oqarpoq Ane Sofie Frederiksen, tuluttut pikkorissanermi atuaqatinilu pilersaarutaasumiit siusinnerusumik atuartitsissutini qaffasissunik angusaqartoq oqarpoq.

- Angusassaq qaffasissoq atuaqatikkalu pilersaarutaasumiit siusinnerusumik anguarput,  malinnaalluarnikkut aamma sulilluarnikkut pitssaasumik angusarissaarluarnerput tulluusimaarutigeqaara, Ane Sofie Frederiksen oqarpoq.

Qinigassat arlaqarput

Ane Sofie Frederiksen angusarissaareernikuulluni angusarissaaqqippoq. 2018-imi aasaanerani Sisimiuni GUX-imi atuaqatimini angusarissaarnerpaalluni ilinniarnertuunngorpoq.

- Kissaatigiuaannarsimavara Amerikami imaluunniit nunami allami ilinniariarnissara. Atuaqatinni angusarissaarnerpaajullunga GUX naammassigakku Hawaimi International Language Combus Honololu-mut qinnuteqarpunga, tassalu maanna tassani ilinniagaq “Ef educatin first” ingerlallugu. Nunat tamalaaneersut Hawaimi oqaatsinik ilinniarfianni pikkorissarfissat assigiinngitsorpasssuit periarfissaralugit pikkorissarneq “academic year” ukiumik ataatsimik sivisussuseqartoq toqqarpara, Ane Sofie Frederiksen nassuiaavoq.

Misigisat ilinniarnerlu

Ane Sofie Frederiksen Hawaimiinnermini angajoqqaarsiaqarpoq, taakkunanilu najugaqarnermini oqaatsinik ilinniarfimmi ilinniartut arfineq marluk allat peqatigalugit najuqarpoq.

- Angajoqqaarsiagut illumi arlariinnik quleriinik initalimmi najugaqarput. Uagut ilinniartuusugut quleriinni qullermi marlukkaarluta ineeqqani ineqarpugut angajoqqaarsiagullu quleriinni naqqarlermi najugaqarlutik, Ane Sofie oqaluttuarpoq, nangipporlu:

- Tuluttut ilinniagaqaatigalunga misigisassat assigiinngitsorpassuit migigakkit Hawaimiinnera nuannareqaara. Atuareeraangatta angalaartarpugut Hawaimiullu kulturiat pillugu takusassarsiortarluta. Kalaallit Nunaat qimallugu ungaseqisumut oqaatsinik ilinniariarama ugguatiginngeqaara.

Ane Sofie Frederiksenip Ef aqqutigalugu nunani allani oqaatsinik ilinniariarnissaannik inuusuttoqatini kaammattorusuppai.

- Inuusuttoqatikka Ef aqqutigalugu oqaatsinik ilinniariarnissaannik kaammattorusuppakka. Qinnuteqareernerup kingorna qarasaasiakkut misilitsittoqartarpoq, aamma Ef Danmark aqqutigalugu pasissutissat pissarsiarineqarsinnaapput taamatullu ikiorneqarnissamut pisariaqartitsigaanni saaffissaallutik, Ane Sofie Frederiksen siunissami nakorsanngorniarusulluni kissaateqartoq oqarpoq.

- Hawaimi tuluttut ilinniarnera upernaaru naammassigukku Sisimiunut uteruma nakorsamut ilinniarnissannut katersillunga sulissaanga, Ane Sofie Frederiksen oqarpoq.

Ane Sofie Frederiksenip Hawaimi tuluttut ilinniariarnera Royal Greenlandimit aningaasatigut tapiissuteqarfigineqarpoq.

Ane Sofie Frederiksenip Hawaimiinnermini assiutai allaaserisap naqqani takuneqarsinnaapput:

Allattoq: Inga Egede, ineg@royalgreenland.com

Assit: Ane Sofie Frederiksen.

Asseq

 
 

Royal Greenland aperiguk

i
Write the text from the image