2019-ip naalernerani imaluunniit 2020-imi januarimi tunisassiorfik atuutilerunia ullormut 15 tonsit 20 tonsillu akornanni tunisassiorsinnaassaaq.

- Tunisassiorfimmi inuit 15-it tikillugit sulisorineqalissammata tunisassiorfik nutaaq Nuussuarmi innuttaasunut annertuumik sunniuteqassaaq. Suliffissanik nutaanik pilersitsisoqarneratigut nunaqarfimmiit nutserarneq annikillisinneqarsinnaavoq, taamatuttaaq aalisartut tunisassiorfimmut tunisisartut 35-it missaaniittut ukiuunerani Nuussuarmi tunisassiorfimmut tunisinnaagallartillutik nunaqarfinnut allanut tunisiartortariaarutissaput, taama oqarpoq Arctic Fish Greenland A/S-imi pisortaagallartoq, Frederik Olsen.

Arctic Fish Greenland A/S-i Nuusuarmi aamma Kullorsuarmi aalisartunit piginneqatigiiffiusoq Royal Greenland A/S peqatigalugu 2017-imi piginneqatigiiffinngoramili siullermeerluni tunisassiorfimmik nutaamik pilersitsivoq.

Sivisunerusumik tunisisinnaalissapput

Nuussuarmi tunisassiorfimmi maanna atuukkunnartumi ullormut aalisakkat tonsit pingasut tunineqarsinnaasarsimasut, nutaaq atuutilerpat qalerallit ullormut 15 tonsit 20 tonsillu akornanni tunisassiarineqarsinnaalissapput. Tunisassiorfimm atuukkunnartumi aalisakkat taamaallaat 130 tonsit qerititsivimmiittuutigineqarsinnaammata tunisassiorfik sapaatit akunnerisa marluk pingasulluunniit ingerlanerini ulikkaartarmat ukiuunerani aalisartut nunaqarfinni allani aalisarlutillu tunisisariaqartarput.

- Tunisassiorfik nutaaq aalisakkanik annertunerujussuarnik qerititsivimmiittuuteqarsinnaassaaq, saniatigut aamma qalerallit niaquerlugit peperuiarlugillu tunisassiarisalissagatsigit tunisasiallu taakku initunnginnerummata naatsorsuutigaara Nuussuarmi aalisartut siornatigorniit sivisunerusumik tunisassiorfimmut tunisisinnaalerumaartut, Frederik Olsen oqarpoq.

Ukioq manna juuli naalersoq tunisassiorfik nutaaq sanaartorlugu allaartinneqarmat Nuussuarmi tunisassiofik matummalli angallat tunitsivik Kampur, savalimmiormiunit pigineqartooq Nuussuarmi aalisartut tunitsivigaat. Tassani nunaqarfimmiut innuttaasut qulit qaleralinnik tunisassiorlutik sulipput. Kampur sapaatit akunnikkaartumik Upernavimmi tunisassianik tulaaasisarpoq taavanilu sikunissaata tungaanut tunitsivittut atuutissaaq.

Kullorsuarmi tunisassaiorfik Arctic Fish Greenland A/S-imiut aamma pigineqarpoq. Ukioq manna juulip aallaqaataani inuit 415-it Kullorsuarni

Nalunaarsorneqarsimapput. Ukioq manna juulip aallaqqaataani inuit 184-it Nuussuarmi nalunaarsoqqapput.

Allaaserisap ataanu Nuussuarmi Arctic Fish Greenland A/S-ip tunisassiorfissaata sanaartorneqarnerani assit takuneqarsinnaapput.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image