Royal Greenlandip 2019-imi januaarip aallaqqaataaniit juunip 30-ata tungaanut ukiup qiteqqunnerani nalinginnaasumik ingerlatsinermi angusai akileraannginnermi siorna taamaalinerani 50 millioner koruuniullutik maanna 87 millioner koruuniugamik angusaqarfiulluarput. Nalitusaaneq, tunisassianik amerlisaaneq, tunisassiornermik annertusaaneq, niuerfinnik tunisassianillu assigiinngisitaartunik inerisaaneq pingaarnertut ukkatarineqarmata Royal Greenlandip iliuusissatut pilersaarutaata “North Atlantic Champion”-ip tunngaviulluarnera uppernarseqqinneqarpoq. Kilisaatit Sisimiut Qaqqatsiallu tunineqarnerini 141 millioner koruuninik iluanaaruteqarnerput nalinginnaasumik ingerlatsinermi angusanut tapertuutaavoq. Kilisaat nutaaq Sisimiut 2019-imi juunimi naammassivoq, Avatarlu 2019-imi oktobarimi naammassissaaq, taamaammat kilisaataatitsinnik tunisinerput kilisaatinik nutaanik marlunnik sanatitsinitsinnut ilaavoq. Kilisaatip Nataarnap taartissaa 2021-imi naammassisussanngorlugu sanatinneqassaaq.

Royal Greenlandip ukiup affaata siulliani angusai katillugit 228 millioner koruuniupput, 2019-imilu angorusutat sulissutigineqarnerat taamaasilluni ajunngitsumik ingerlavoq.

 

Aallussanik tuniniaaneq angusaqarfiulluarsinnarpoq

Royal Greenlandip aallussaminik; raajanik uusunik qalipaajakkanillu, qaleralinnik saattuanillu tunisisarnerata patajaatsumik ingerlanera nalinginnaasumik ingerlatsinermi angusarissaarnermut peqqutaalluinnarpoq.

Raajat uusut qalipaajakkallu akigissaarnerisa 2018-ip qiteqqutereernerata kingorna attanneqarsimasinnaanerisa kingunerisaannik tunisatigut kinguariaateqarfiugaluartut isertitatigut malunnartumik siuariaateqarfiupput. 

Qalerallit tunisatigut 13 %-nik siuariaateqarfiupput, Canadap kangiani Kalaallit Nunaannilu saattuanik aallussinerit angusatigut 35 %-nik siuariaateqarfiupput.

Aalisakkanik qaqortumik nerpilinnik aalisarneq tunisinerlu aammattaaq Royal Greenlandip angusarissaarneranut peqqutaaqataapput. Barentsip imartaani aalisarluartoqarnera saarulliillu akiisa qaffakkiartornerat isertitaqarnerungaatsiarnermik kinguneqarpoq.

Ingerlatseqatigiiffiup ineriartornissaani ilimagisat

Nalinginnaasumik ingerlatsinermut tunngatillugu 2019-imi angusat 2018-imi angusanit amerlanerussangatinneqarput, tamatumani kilisaatit tunineqarnerannit iluanaarutit ilanngullugit. Taamaakkaluartoq Tuluit Nunaata EU-mit ilaasortaajunnaartussanngornera, USA-p Kinallu niuernikkut akornusersuunneruleratarsinnaanerat nunarsuarmilu aningaasaqarniarnerup ingerlarngata kinguariaateqarfiunera ingerlatseqatigiiffiup iluanaarutaanut sunniuteqarsinnaapput.

 

Paasisaqarnerorusukkuit pisortaaneq Mikael Thinghuus oqarasuaataanut angallattakkamut +45 50 89 30 00-mut sianerlutit paasiniaaffigisinnaavat.


Ukiup qiteqqunnerani nalunaarusiaq uani atuaruk: 
Ukiup qiteqqunnerani nalunaarusiaq 2019

Asseq

 
 

Royal Greenland aperiguk

i
Write the text from the image