Corona-mik nappaalasoqarnera pissutigalugu umiarsuarmik sanaartorneq qaammatinik pingasunik kinguartoorpoq. Naatsorsuutigineqarpoq umiarsuarmik sanaartorneq 2021-imi aggustimi naannassineqassasoq, Ice Trawl Greenland A/S-imi siulersuisuni siulittaasoq, Ove Rosing Olsen ilisimatitsivoq.

- Corona-mik nappaalasoqarnera pissutigalugu singitsinermi umiarsuaatileqatigiiffiup siulersuini ilaasortanik peqataasoqassanngilaq. Umiarsuup maskinmesteria, Asbjørn Petersen, umiarsuup sanaartorneqarnerani nakkutilliisuuvoq, taama oqarpoq Ove Rosing Olsen, nangillunilu:

- 2021-imi Ice Trawl Greenland A/S umiarsuaatileqatigiiffittut ukiut 30-inngortorsiussaaq. Umiarsuaatileqatigiiffiup siulersuisui ukiuni taakkunani angusaqarluarsimaneq naammagisimaarpaat, taamatuttaaq umiarsuarmik kinguppanniummik taama kusanartigisumik nutaaliaatigisumillu umiarsuaatileqatigiiffiup ukiuni 30-ini atuussimanera malunnartinniarneqassammat nuannaarutigaarput.

Kinguppanniassaaq

Kilisaat kinguppanniut nutaaq meterinik 82,30-inik takissuseqarpoq meterinillu 18-inik silissuseqarluni. Kilisaat 30-nik inuttaqarsinnaavoq, ataasiittarissanik 28-nik ineerartaqarpoq marluuttarissamillu ataatsimik ineerartaqarluni. Umiarsuaq quleriinnik, katillugu 2950 kubikmiiterinik initussuseqartunik usisarfeqarpoq.

Nataarnaq nutaaq Kalaallit Nunaata imartaani kilisannerup saniatigut Svalbardip imartaani kilisassaaq, soorlu Nataarnaq maannamut atuuttoq assigalugu kilisaat nutaaq raajarniutitut taamaallaat atorneqassaaq.

Ice Trawl Greenland A/S-ip siulersuisuisa pilersaarutigaat kilisaat nutaaq 2021-imi ukiakkut Kalaallit Nunaannut apuunneqarpat Sisimiuni atserneqarumaartoq

Allattoq: Inga Egede, ineg@royalgreenland.com

Asseq: Ice Trawl Greenland A/S

Asseq

 
 

Royal Greenland aperiguk

i
Write the text from the image