Qanittumi Ilulissani aalisartut allaanerulaartumik suliaqarput. Qaleralinniarnermut taarsiullugu qassutit, allunaasat aalisarnermilu atortut allat nissinniarpaat.   

Qaleralinniarneq umiatsiaaqqanit, ningattakkersuutinit aamma kilisaatinit iluliaminernit iluliarsuarnillu Ilulissat Kangerluanneersunit tusaamasaasumit avatangerneqarlutik ingerlanneqartarpoq. Silarsuarmi sermit iigartartut aniatitsinerpaat ilagaat – UNESCOp pinngortitamit kingornutassianik allattugaataanut ilaavoq.  

Tamaani aalisarfigiumaneqaqisumi aalisartut qassutitik imaluunniit ningittakkatik siku silaluunniit patsisigalugit annaasarpaat. Atortut taakku annaaneqartut qassutaarsiutinik taaneqartartut immami avatangiisinut aalisakkanulluunniit pitsaanngillat. Taamaattumik Aalisartut Piniartullu Peqatigiiffiannut IAPP-mut ilaasortat annaasanik nissiiniarnermik suliniummik aallarniipput. Aalisartut nunaqavissut piumassutsiminnillu peqataasut Ilulissat, Saqqap aamma Torsukattaap eqqaani nissiiniarneq aalisarnermik inuussutissarsiornermi akuusut ilaasa anigaasaleeqataanerisigut naammassivaat.

Aalisartut piniartullu peqatigiiffiat IAPP annaasanik nissiiniarnermi aaqqissuisuuvoq, tusagassiorfinnullu nalunaarummini taavaat suliaq aningaasaliisoqarnani ingerlanneqarsinnaasimanngitsoq. Suliamut Royal Greenland 75.000 koruuninik tapiissuteqarpoq.  

IAPP nammineq 60.000 koruuneerpoq tapiissutillu allat umiatsiaaqqanik angallatinillu annerusunik sapaatip akunnera ataaseq attartornermut atorneqartunut akiliutaapput. Qaqitat arlaqaaloqaat.

  • Iluliarsuit eqqaanni qassutaarsiutit annertuut qallorneqarput nissiiniaanermi taavalu puttaqutit amuarneqanngitsut amuarneqarlutik.
  • Ilulissat saavani oqimaatsut nalunaarutigineqarnikut nuisikkamik tamarmik qassutaarsiutaapput ningittakkanik akullit.
  • Niaqornarsuup eqqaani qassutaarsiutit immikkoortut ataatsit amuarneqarput.
  • Torsukattammi nunamut pitunnikut marluk amuarneqarput, qassutaarsiutit nunamut pitunneqarnikut amuarneqarput.
  • Torsukattammi umiatsialiviit/tuperfiit/illuaqqat eqqaani eqqakkat ningittagakut, qassutikut, batteriikut, kissarsuutikut aalisarnermullu atortukut assingiinngitsorpassuit katersorneqarput umiatsiaq poca 600 ulikkaartaarlugu sisamariarlugu.

Aalisartut naapertorlugit qassutaarsiutit amuarneqarnerisa iluaallaataanera malugineqareerpoq, tassa aalisarneq pitsaanerulermat. Tusagassiorfinnut nalunaarummi IAPP aningaasaliisut tapersersuinerannut qujavoq.

Oktobarimi novembarimiluunniit nissiiniaqqiineq pilersaarutigineqalereerpoq, taamaalineranilu Ilulissat kangia’tungaani sikup killingata eqqaani. Umiarsualiviup eqqaani aamma tupertarfiit illuaqqallu eqqaanni IAPP napasumik allagartaliilluni nivinngaaniarpoq sumut tamaanga eqqaasoqassannginneranik imalimmik.

IAPP tusagassiorfinnut nalunaarummi naggasiivoq nissiiniaanerit akulikinnerusumik ingerlanneqartarnissaat kissaatigalugu aamma susassaqartuniit aningaasaateqarfinniillu naammattunik taperserneqarsiinnaalerumaartoq neriuutigalugu kingusinnerusukkut ukiaru ingerlanneqarsinnaaqqullugu. Aamma aalisartut piniartullu peqatigiiffiinut allanut ilisimasanik siunnersuisinnaalluni aallartisaaqataanissamut piareersimavoq.

Asseq

 
 

Royal Greenland aperiguk

i
Write the text from the image