Royal Greenlandip iliuusissatut pilersaarutini ”The North Atlantic Champion” tunngavigalugu imarmiunik Atlantikup Avannaata imartaaneersunik ingammik raajanik issittup imartaaneersunik, qaleralinnik saattuanillu nunarsuarmi pilersuisuni siuttunngornissani anguniagaraa.

Periusissatut pilersaarusiap ukiuni arfinilinni atuunnera piujuartitsinermik tunngaveqarneranik takutitsivoq.

Raajalli uutat qalipaajakkallu akiisa nikerarnerat pissutigalugu ukiup affaani siullermi inernerit unammillernartoqarsimapput.

Kaaviiaartitat 3%-imik qaffapput pingarnertullu aallussat periusissatut pilersaarusiaq "The North Atlantic Champion" naapertorlugu kaaviaartitat ingerlalluartuarsinnarnerannut suli peqqutaapput. Ullumikkut kaaviiaartitat 77%-ii pingaarnertut aallussaneersuupput, ukiut arfinillit matuma siorna 41%-iinnaasimasut.

Tapertaralugu suliniutit ilaatigut tassaapput ikerinnarsiortunik natermiunillu aalisarneq, pingaarnertut aallussanut tapertatut suliniutaasut. 

Ineriartorneq Royal Greenlandip tunisassiami niuerfigisartakkamilu tungaatigut patajaatsumik pitsaasumillu inissisimaneranut kiisalu ingerlatseqatigiiffiup tamakkiisumik ingerlatsinermigut nalitusaaneq tunngavigalugu asseqanngitsumik inissisimaneranut uppernarsaataavoq, tamatumani Royal Greenlandip aalisakkanut, pisisartunut atuisunullu qaninnerpaajunissani kissaatigiuarmagu.

Periusissatut pilersaarut naapertorlugu suliniutit iluaqutaapput, aalisarneqartartut uumatitsivimmiittuunatik immami aalisarneqartarmata pisassiissutinik amerlanerusunik tunineqarnissaq naatsorsuutigineqarsinnaanngitsillugu tunisassiassat amerlanerusinnaanngimmata Royal Greenlandip pissuseqatigiiaat Atlantikup Avannaani aalisarsinnaariigaasa nalitusarnissaat  "North Atlantic Champion"-ip pingajussaani pingaarnertut ukkatarineqarpoq.

Inuiaqatigiinnut annertuumik akisussaaffeqarnerup aammalu aningaasarsiornikkut eqqummaarinnerup oqimaaqatigiissaariffigineqarnissaat Royal Greenlandip ilisarnaataasa ilagaa - Kalaallit Nunaata inuiaqatigiivinut piginnittuanullu Namminersorlutik Oqartussanut aammalumi inuiaqatigiippassuarnut allanut nunarsuarmi akuuffigisatsinnut iluaqutaasussamik pisussaaffigaa.

Royal Greenland 2019-imi aamma aatsaat taamak aningaasaliitigaaq, tassami kilisaatit M/tr Sisimiut aamma M/tr Qaqqatsiaq kilisaatinik nutaanik marlunnik taarserneri inaarsarneqarput. Kilisaat nutaaq siulleq, aamma M/tr Sisimiut-mik atserneqartoq 2019-imi juunimi tunniunneqarlunilu M/tr Avataq decembarimi tiguneqarpoq.

Kilisaatit pingajuata M/tr Nataarnap taartissaata umiarsualiorfimmi tassanerpiaq sananeqaleruttortup 2021-mi tunniunneqarnissaa naatsorsuutigineqarpoq.

Tunisassiorfinnut tunngatillugu sinerissap qanittuarni aalisarneq patajaallisarniarlugu tunitsivinnik ingammik nunatta avannaaniittunik suli nutarsaasoqartuarsinnapoq.

Periusissatut pilersaarusiaq naapertorlugu suliniut nutaaq, tassa Newfoundlandimi tunisassiorfimmik nutaamik peqqussuarnik uumasunik aapasutut, uutatut uumasutullu tuniniarneqartussanngorlugit tunisassianik ineriartortitsisussamik aallartinneqarpoq.

A&L Seafoods Nova Scotiamiittoq suliffeqarfissuarmi ingerlatsivittut nutaatut ingerlalluarpoq, suliffeqarfissuarmilu saattuanik tunisassiorneq patajaallisaqqinniarlugu aammattaaq ingerlatsivik Chilemiittoq piginneqataaffigineqalerpoq.

Niuernikkut ineriartorneq namminerlu aningaasaatit 1,7 mia. DKK-usut – patajaassusaat 31%-iusut - Royal Greenlandip anguniakkani anguniarlugu pilersaarusiukkamik ukkassilluinnarneranut aningaasaqarnikkullu patajaatsumik inissisimaneranut uppernarsaataapput;

tassalu imarmiunik Atlantikup Avannaata imartaaneersunik ingammik raajanik issittup imartaaneersunik, qaleralinnik saattuanillu nunarsuarmi pilersuisuni siuttunngornissaq.

2020-mi aalisarnerup tunisassiattalu Atlantikup Avannaani aalisarneqartut niuerutiginerisa tunngaviusumik pitsaasumik ingerlalluaannarnissaat ilimagineqarpoq Covid-19-ili tuniluunnera taaneqartoq suliffeqarfissuarmut sunniuteqangaatsiassaaq .

Matumani minnerunngitsumik nappaatip tuniluuttup Covid-19-ip tuniluunnerata sivisussusaa eqqarsaatigalugu 2020-mi angusat pisut assigiinngtsut peqqutigalugit annertuumik sunnernerlunneqarnissaat naatsorsuutigineqarpoq, annertussusaali maannamut annertuumik nalorninartoqarfiuvoq.

Pissutsit malinnaaffigeqqissaarneqarput Royal Greenlandilu ajornartorsiornermik qaangiilluaqqullugu sunniutit sapinngisamik minnerpaajutinniarlugit pisariaqartunik iliuuseqarpugut.

Ukiumoortumik naatsorsuummi tusagassiutinut nalunaarummut ilanngunneqartumi uani sukumiinerusumik paasisaqarsinnaavutit. Royal Greenland A/S qullersaqarfimmi Nuummiittumi maajip 13-iani 2020 ataatsimeersuassaaq.  

 

Paasisaqarnerorusukkuit pisortaaneq Mikael Thinghuus oqarasuaataanut angallattakkamut + 45 50 89 30 00-mut sianerfigalugu attavigisinnaavat.

Asseq

 
 

Royal Greenland aperiguk

i
Write the text from the image