Taamalillutik illoqarfimmi aalisartut tunisassiorfimmut pisaminnik tuniseqqissinnaalerput.

- Qeeqqat karsit arfinillit ullumi pisakka tunivakka. Tunisassiorfimmut tunisisinnaaqqilernera nuannaarutigaara, piffissamimi tunisisinnaannginninni aningaasatigut annasaqarama, taama oqarpoq Kangaatsiami aalisartoq Svend Jerimiassen.

2020-imi marsip qulingiluaanili Kangaaatsiami tunisassiorfimmut tuniseqqusiunnaarnermi aalisartut 20-it missaaniittut eqqugaasut Svend Jerimiassen ilagaat. Kangaatsiami tunisassiorfimmut aalisakkanik tuniseqqusiunnaarneq pivoq illoqarfimmi imissaaleqineq pissutigalugu Nukissiorfiit tunisassiorfiup matuneqarallarnissaanik inassineratigut. Nukissiorfiilli immikkut iliuuseqarnerisigut tunisassiorfik apriilip arfineq aappaani ammaqqippoq. Tunisassiorfimmili imeq ullormut atorneqarsinnaasoq 30.000 literiinnaammata tunisassiorfik aalisakkanik ilivitsuutillugit qerititanik tunisassiorallarpoq.

- Tunisassiorfimmi suliassat aallarteqqinnerat nuannaarutigaarput, naak imermik atuisinnaanitta killeqarnera pissutigalugu qeeqqat, suluppaakkat aamma qalerallit 20 kiilukkaarlugit poortorlugit maannamut tunisassioraluarluta, taama oqarpoq Kangaatsiami tunisassiorfimmi key-useri, Olina Themothæussen.

Olina Themothæusen aamma oqarpoq killilimmik imermik atuisinnaanertik pissutigalugu maannamut sulisut aalisakkanik qerititerillutillu poortuisut sisamaannaat sulisorigallaritik.

-Illoqarfimmi imermik pilersuineq aaqqinneqapallakkumaartoq neriuutigaarput, tamannalu suannik saarullinnillu tunisassiulinnginnitsinni piumaartoq neriuutigivarput. Tunisassiorfimmi suliassat annertusiartorneri ilutigalugu sulisut amerlanerit sulisorilissavavut. Tamakkiisumik tunisassiortilluta inuit 70-it tikillugit sulisorilertarpavut, taakku ilarpassui nunaqarfinniit illoqarfinniillu allaniit suliartortuusarput, Olina Themothæussen oqarpoq.

Nukissiorfiit nittartakkaminni ilaatigut ima paasissutissiipput:

-Kangaatsiami imermik pilersuineq ajornartoornermi pilersuinertut isigineqassaaq juunip aallartinnerani ilisimagineqartutut manngunnerulernissaata tunngaanut. Nukissiorfiit iliuusissanik aallartitsipput siunissami taamatut pisoqaqqinnginnissaa pinngitsoorniarlugu. Naatsorsuutigineqarpoq iliuutsit tamakkua aasap ingerlanerani aallartinneqarnissaat, taamaattumillu ukioq manna ukiorpat sunniuteqalereersimassallutik.

Allattoq: Inga Egede, ineg@royalgreenland.com
Asseq: RG

Asseq

 
 

Royal Greenland aperiguk

i
Write the text from the image