Aalisartut 100-it sinneqartut kujataani Paamiuniit avannaani Sisimiuneersut saarullinnik uumatitanik tunisisimasut tunisamik annertussusaat naapertorlugit agguagarsitinneqassapput.

Aalisartut agguagarsisussat ilaat Royal Greenlandimiit naapipparput

- Juullertinnagu annertuumik agguagarsitinneqarnissarput nuannersumik tupaallaatigaara. Isumaqaraluarama annikitsuinnarmik tunineqassasugut, kisianni saarulliit uumatitat 187 tonsinik oqimaassusillit kilisaammut uumatitsivimmut tuninikuugakkit ilimagisanniit annertunerusumik tunineqassaanga, aalisartoq Jens Abelsen Nuummeersoq oqarpoq.

Jensi pujortuleeqqamut 42 fodsinik takissusilimmut ”Angaaraq II”-mut piginnittuuvoq. Jensi kujataani Paamiuniit avannaani Sisimiut kangerluini saarullinnik uumatitanik ukioq manna aalisartoqarnerani aalisaqataavoq. Saarulliit uumatitat 4500 tonsit sinneqartut kilisaammut uumatitsivimmut ”Maniitsoq”-mut ukioq manna tunineqarput. Aalisakkat tunineqartut amerlanerpaartaat Royal Greenlandip tunisassiorfianut Maniitsumiittumut assartorneqarput, tassanilu tunisassiatut mamarluinnartutut Nutaaq-coditut tunisassiarineqarput.

KNAPK isumaqatigiissuteqarfigineqarpoq

Agguagarsisitsineq KNAPK-mik isumaqatigiissuteqarneq naapertorlugu pisussaasoq Royal Greenlandimi tunisassialerinermi ingerlatsisoq Sten Sørensen oqarpoq.

- 2020-mi aalisartoqalinnginnerani KNAPK-lu isumaqatigiissusiorpugut, Covid-19-illu nalaani akit appariartoraluartut isumaqatigiissuterput eqquutsissavarput. Taamaammat aningaasat 3 milloner koruuninik annertussusillit agguagarsiassatut aalisartunut tunniunneqassapput, Sten Sørensen oqarpoq, nangipporlu:

- 2020-mi saarullinniarnerup nalaani aalisakkat uumatitat tunineqartut katillugit annertussusaat naapertorlugu aalisartut ataasiakkaat agguagarsitinneqassasut isumaqatigiissutaavoq. Agguagarsisitsineq tamanut atuummat aalisartut annikitsuinnarmik tunisisimasut aamma agguagarsinissaat qulakkeerneqarpoq, Sten Sørensen oqarpoq.

Saarulleqarluarnera ersersinneqarpoq

Saarullinnik uumatitanik aalisarneq tunisinerlu 2020-mi maajimiit novembarip naanerata tungaanut ingerlanneqarpoq. Agguagarsiassarpassuit saarulleqarluarneranik ersersitsisut Sten Sørensen nassuiaavoq.

- Aalisakkanik uumatitanik tunisisoqarluarsimanera agguagarsiassarpassuarnik tunisinissap takutippaa. Nerpinnik sapinngisamik tunisassiornissamut nukissanik atuinissarput ukkatarinikuuarput. Saarullinnik ilivitsunik nioqquteqarnermut sanilliullugu nerpinnik nioqquteqarneq akit apparnerannik sunnerneqarpoq, Sten Sørensen oqarpoq.

Sapaatip-akunneri ulapaarfiusut

Saarullinnik uumatitanik aalisarneq juulimi pileruttormat, aalisakkanillu aallertoqarnissaanut utaqqineq sivisummat, kilisaat Sisimiut ikiuilluni ullut 14-it missaanni tunisassiortinneqartariaqarsimavoq.

- Taamaaliornitsigut nukissagut tunisassiorfimmi Maniitsumiittumi aamma kilisaammi Sisimiuni nerpiliornermut atorsinnaasimavagut. Sapaatip-akunneri taakku ulapaarfioqaat, angusarli pitsaammat pisisartutta nuannaarutigisaannik saarulliit nerperpassuinik tunisassiorpugut, Sten Sørensen oqarpoq.

Jens Abelsenip juullertinnagu agguagarsinissani naammagisimaarpaa.

- Inuttat pingasut uangalu, kiisalu pujortuleeqqap agguagarsiat avissavagut. Aningaasat pisariaqartinneqartuaannarmata aningaasannalaarnissarput qujanarpoq. Aningaasat ilaat pujortuleeqqamut atortussanut atussamaarpakka, Jens Abelsen oqarpoq, nangipporlu:

- Agguagarsiassat 2021-mi saarullinnik uumatitanik aalisarnissamut kajumissaataalluinnarput, taamaammat aappaagumut qilanaalereerpunga.

Allattoq: Inga Egede, ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image