Ullumi sapaammi 21. juuni 2020, Kalaallit Nunaata inuiattut ullorsiornerani Københavnimi Kalaallit Peqqissartut Illuat Aalisarnermillu Ingerlatseqatigiiffik peqqissarfimmiittunut nakorsamit misissortikkiartorlutik katsorsartikkiartorlutilluunniit Danmarkimiittunut isumalerujussuusussamik tapiissuteqarnissamik nutaamik isumaqatigiissuteqarput.

Ice Trawl Greenland A/S 2012-imili ukiumut 120.000 koruuninik tunissuteqartarpoq, nutaamillu isumaqatigiissuteqarnermi ukiumut tunissut 150.000 koruuninut qaffanneqarpoq. Aningaasat peqqissarfimmiittut pillugit suliniuteqarnernut kulturikkut ataatsimoornernullu tunngassuteqartunut atugassaapput. Ilanngullugu Aalisarnermik Ingerlatseqatigiiffiup peqqissarfimmiittut inaanni tv-kkut isiginnaarutinik nutaaliaasunik isersimaartarfinnilu pequttanik pisinerit akilerpai.

2012-imili tunissutit

Aalisarnermik Ingerlatseqatigiiffik sinnerlugu Ice Trawl Greenland A/S-ip siulersuisuini siulittaasoq, Ove Rosing Olsen, nakorsatut sulisimanerminit nakorsiartut atugaat ilisimasaqarfigigamigit tapiissuteqarnissamut isumaqatigiissummik atsiortuuvoq.

- 2012-imi suli nakorsatut suligallarama Kalaallit Peqqissartut Illuata sananeqarnera Henrik Walsted, sanaartornermik nakkutilliisoq, ikiortigalugu malinnaaffigaara. Sanaartornerup naammassiartornerani fjernsyninut aningaasassaqanngitsoq paasinarsivoq. Taamani tv-kkut isiginnaarutinik internetsimut atassutilinnik pisinissamut suliniummik piumasaqarpunga, Ice Trawl A/S-ilu tv-kkut isiginnaarutinik pisinissamut atugassanik 200.000 koruuninik tunissuteqarpoq. Taakku massakkut pisoqalisimagamik taarsertariaqarput, Ove Rosing Olsen nassuiaavoq, nangillunilu.

- Napparsimasut sivisuumik uninngasut suliassaqartinneqarnissaat pisariaqartoq siulersuisut 2012-imi aamma takuaat, tamatumunngalu ukiumut 120.000 koruuninik tunissuteqarput. Ice Trawl A/S-ip ukiumut tunniunneqartartut qaffallugillu tapiisarneq ukiunik tallimanik sivitsormagu nuannaarutigaara, taamaaliornikkut uninngasut ataatsimut suliassaqarsinnaanerat ingerlaannarsinnaavoq. Tunissuteqarnikkut tamanna pisinnaammat uummatiga nuannaarpoq, Ove Rosing Olsen oqarpoq.

Nuannaartitseqaaq

Ice Trawl Greenland A/S-ip tapiissuteqarnissamut isumaqatigiissut sivitsormagu Kalaallit Peqqissartut Illuanni pisortap aamma nuannaarutigaa. Uninngasut illu qimallugu avatangiisini allani ataatsimoorlutik misigisaqartinneqarnissaannik tapiissuteqarneq periarfissiivoq. - Kalaallit Nunaata inuiattut ullorsiornerani isumaqatigiissutip atsiorneqarnera naleqquppoq. Dyrhavemut angalaarnissaq ullormi pisussatut pilersaarutaavoq. Uninngasut nuannersunik avatangiiseqarlutik ataatsimoornissamut periarfissinneqarput, Birtha Bianco, Kalaallit Peqqissartut Illuanni pisortaq oqarpoq. Kalaallit Peqqissartut Illuat uninngasunut, qanigisaannut ingiaqataannullu 70-inut inissaqartitsivoq, arlaqartullu Rigshospitalimi napparsimmavinnilu allani sivisuumik katsorsarneqarput.

- Taamatut atugaqarnermi angerlarsimaffiup qimaqqanera oqimaattarpoq. Taamaammat uninngasut anillutik misigisaqaqatigiissinnaanertik nuannaarutigisaqaat. Suliaqartitsinerit ilai taassagaanni assersuutigalugu Kalaallit Nunaannut juullimi inuulluaqqusinermut peqataasimallutillu DR-ip koncerthusianut angalaarsimapput. Corona pissutigalugu angalaarnissaminnut periarfissaqarsimanngillat, bussinili taamak amerlatigisut ataatsimoortinneqarnissaat akuerisaariarpat angalaarnerit allat pilersaarusiorneqarumaarput. Kalaallit Peqqissartut Illuanni uninngasuulluni anilaarneq uninngaqatinillu misigisaqaqateqarneq uninnganermut oqilisaataaqataasinnaavoq. Tamannalu ukiumoortumik tapiissuteqartarnikkut kisimi pisinnaavoq, Birtha Bianco naggasiilluni oqarpoq

Asseq

 
 

Royal Greenland aperiguk

i
Write the text from the image