27-nik ukiullip Hanne Aarslev Jensenip, diplomingeniøritut ilinniagaqartup inuussutissarsiornermilu ph.d.-tut ilisimatusarluni aallarteqqammertup, Royal Greenland raajanik qalipalinnik qaqerlaatut uutanik qerisunik tunisassiornerata pitsaassusaanik qaffassaanissamik ikiussavaa. Hannep Royal Greenlandip raajanik qalipalinnik qaqerlaatut uutanik qerisunik tunisassiornerani raajat qalipaatimikkut mamassutsimikkullu allannguuteqarnermikkut pitsaassusaasa appartinneqartarnerisa pinaveersaartinnissaat anguniarlugu periusissanik nassaarnissamut ikiussavaa.

Coronap ajornartoortitsinera pissutigalugu pilersaarutit allanngorput

Hanne Aarslev Jensen pilersaarutit naapertorlugit 2020-mi apriilimi laboratooriami ilisimatusalertussaagaluarpoq. Coronalli ajornartoortitsinerata kinguneranik Danmark matuneqarmat DTU-p laboratooriai sapaatip-akunnerini arlalinngortuni matoqqasimapput. Taamaammat Hannep raajat pillugit allaaserisanik – ilaatigut pisarineqarnerisa, tunisassiarinerisa, tappiorannartoqassusaasa uninngasuutigineqarnerisalu raajat pitsaassusaannut qanoq sunniuteqartarneri pillugit allaaserisanik – atuarluni ph.d.-tut ilisimatusarnini aallartippaa.

Hanne Aarslev Jensenip allaaserisanik atuarnini laboratooriami avataanilu ilisimatusarsinnaaleqqikkuni tunngaviulluassasoq isumaqarami pilersaarutit allanngornerat iluatsitseriataarnertut isumaqarfigaa. Avataani sulinermini ilaatigut Royal Greenlandip tunisassiorfianut Tysklandimiittumukarlunilu raajarniutinut nunatsinniittunut ilaassaaq.

Suliffeqarfiit ilisimatusarfiillu ataqatigiilersillugit

Royal Greenlandi siornatigut DTU Fødevareinstituttet peqatigalugu ilisimatusarnermik inerisaanermillu, taamatuttaaq ph.d.-tut sulianik arlalinnik, suliniuteqartarnikuuvoq. Inuussutissarsiornermi ph.d.-tut allaaserisat apeqqutit ajornakusoortut, soorlu raajat qalipallit qaqerlaatut uutat pitsaassusaasa qaffassarnissaat, pillugit akissutissarsiornikkut suliffeqarfiit pisariaqartitaannik ilisimatusarfiillu laboratooriaannik kiisalu ilisimatuussutsikkut paasisimasaqarluarnermik ataqatigiisilertaramik iluaqutaapput.

Hanne Aarslev Jensenip ukiuni pingasuni inuussutissarsiornermi ilisimatusarluni suliassaa ”Skalrejer – nye teknologier til styring af oxidation og mikrobiologisk kvalitet og fødevaresikkerhed”, tassa raajat qalipallit asiujartornerisa aqunneqarnerat, tappiorannartut sananeqaataasa pitsaassusaat kiisalu inuussutissalerinermi isumannaallisaaneq, Innovationsfondimit Royal Greenlandimiillu aningaasaliiffigineqarpoq.

Tigulaariffik: DTU Fødevareinstituttet.

Asseq

 
 

Royal Greenland aperiguk

i
Write the text from the image