- Ullut ilaanni avalannermi ataatsimi nalinginnaasumik kilisattakkagut 400-500 tonsiusartut sinnerlugit kilisannissarput tupaallannartuunngilaq. Ullumikkullu piviusunngorpoq. Raajanik 903 tonsinik oqimaassusilinnik useqarluta maanna Sisimiuni usingiarpugut. Aatsaat taamak pisaqartoqartigaaq, nunatsinni kilisaammi anginerpaami naalagaq Jógvan Tróndarson usingiarnerup nalaani taama oqarpoq.

Avataq 2.850 kubikmeterinik useqarsinnaagami, 82,3 meterinik takissuseqarami 18 meterinillu silissuseqarami Royal Greenlandip kilisaataataani anginerpaallunilu nunatsinni kilisaatini anginerpaavoq. Kilisaattaaq qaleralinniarlunilu raajarniarsinnaavoq. Taamak useqarsinnaatigaluni avalannermi kingullermisut pisaqartiginissamut piffissaq apeqqutaaginnarpoq.

- Kilisanneq 2020-mi apriilip 25-ani aallartinneqarpoq, sapaatip-akunnerisalu pingasut ingerlanerini raajat 903 tonsit kilisappagut. Usigut niujartorlugit ullumi tikippugut, usittalu 18 procentii raajanik tunisassiorfimmi Sisimiuniittumi uutatut qalipaajakkatullu tunisassiarineqarlutillu sinneri qaqerlaatut uutatut avammut tunisassanngorlugit tunisassiarineqarput, Jógvan Tróndarson oqarpoq.

Taassuma kilisaatit naalagaat allat oqaloqatigisimavai, oqaloqataasalu usit rekortiusut uppernarsarpaat, taamaammallu pisoq nunatsinni aalisarnerup oqaluttuarisaanerani pingaaruteqarpoq.
- Kilisaat Markus umiarsuaatileqatigiiffimmit Qajaq Trawlimiit pigineqartoq raajanik 870 tonsinik oqimaassusilinnik sapaatip-akunnera kingulleq useqarsimasoq, tamannalu aamma rekortiusoq ilisimavarput, Jógvan Tróndarson nassuiaavoq, inuttanilu 24-jusut nersualaarpai.

- Umiarsuaatileqatigiiffinni unammisoqanngikkaluartoq inuttakka tulluusimaarutigaakka. Avalannermi matumani ulapissimaqaat. Pisorlu aamma nuannaarutigeqaat. Inuiaqatigiinni naleqalersitsinermut peqataasinnaagatta tulluusimaarutigaarput. Avammut tunisisarneq annertusillunilu suliffinnik pilersitsivoq.  

Piffissaq apeqqutaaginnarpoq

Nunatsinni kilisaatit ukiuni kingullerni alliartuinnarput. Royal Greenlandimiinnaq kilisaatit nutaannginnerit kilisaatinik nutaalianik immami tunisassiorfiusunik useqangaatsiarsinnaasunillu taarserneqarput. Tassaapput Sisimiut - 2019-imi ukiami tiguneqartoq, Avataq - 2020-mi januaarimi tiguneqartoq, kilisaallu raajarniut Nataarnaq, Royal Greenlandip immikkoortortatut ingerlatseqatigiiffianit Ice Trawl A/S-imit pigineqartoq ukiorlu ataaseq qaangiuppat tiguneqartussaq.  

- Kilisaatit aalisakkanik raajanillu useqarnerullutik tulattarnerat sungiunniagassaraarput. Avataq aamma qaleralinniarsinnaavoq, rekortileeqqinnissatsinnullu piffissaq apeqqutaaginnarpoq. Immaqa tulliani 1000 tonsinik useqassaagut, Jógvan Tróndarson oqarpoq.

Kilisaatit nalinginnaasumit pisaqarnerusarnerat pisuussutinut artukkiinngilaq. Illua-tungaanik avatangiisimut pitsaaneruvoq.


- Kilisaatit nutaaliat atorlugit aalisaraangatta piffissamik nukissamillu sipaartarpugut. Siornatigut usingiariartoriarluta avalaqqittarnikuulluta maanna sivisunerusumik avalaqqasinnaalerpugut. Kilisaatini nutaannginnerusuni useqarfigut ulikkaaraangata Upernaviup eqqaaniit Nuummut Sisimiunulluunniit usingiariartortarnikuuvugut. Maanna sivisunerusumik avalaqqasalerpugut, qerititsivippullu aalisakkanik raajanillu ulikkaaqqaarumasaratsigu usingiariartornissaraluarput sipaartarparput, kilisaatip naalagaa nassuiaavoq.


- Orsussamik kuutsitsinikinnerullutalu atuinikinnerusugut, tamannalu pinngortitamut pitsaanerusoq oqartoqarsinnaavoq. 

Rekortimut uterutta. Naalagaq aatsaat taamak pisaqartigisoqarnera inuttanit qanoq qisuariarfigineqarnersoq aperineqarami ima akivoq: 


- Kilisaatinik nutaanik sananissamik eqqarsaqqaaleratta kilisaatit sutigut tamatigut piginnaasaqarnerunissaat eqqarsaataavoq. Kilisaatip qaavani tunisassiorfianilu sillimaniarneq sulinermilu atugassarititaasut aamma ukkataringaatsiarpagut. Avataq inissaqarnerullunilu atortoqarnerugami suliffigissallugu pitsaaneruvoq. Inuttat sivisunerusumik avalaqqasarnermut sungiussiartorput, sulinermilu atugarissaarnerunerat timaannut sulerulunnannginneruvoq. Nuannaarlutillu naammagisimaarinnittut takusarpakka, akissarsingaatsiassamaaramillu ulluni makkunani nuannaarnerupput, Jógvan Tróndarson qungujulalluni oqarpoq.

Avataq ullumi marlunngornermi maajip 19-iani 2020 Sisimiuniit avalassaaq.

Avatap atertaartinnera: Avataq sequnnarissumi atertaartinneqarpoq

Avataq usingiaasoq videomi takuuk:

Allattoq: Inga Dora G. Markussen
idma@royalgreenland.com

Asseq

 
 

Royal Greenland aperiguk

i
Write the text from the image