Covid-19 nunarsuaq tamakkerlugu unammillernartorpassuarnik pilersitsivoq, unammillernartullu Royal Greenlandimut aamma sunniuteqarput. Suliffeqarfik nunani arlalinni tuniniaanermut allaffeqarpoq immikkoortortallu najukkami oqartussat peqqussutaat malippaat. Sulisorpassuit, soorlu Svenstrupimiiittut, oqartussat Danmark 2020 apriilip 13-iata tungaanut matugallarmassuk angerlarsimaffimmi suleqquneqarsimapput.


Nunatsinni Covid-19-imut tunngatillugu unammillernartut ilagaat peqqinnissaqarfimmi sulisut assartuinerlu eqqaassanngikkaanni nunatsinniit nunatsinnullu timmisartornerup apriilip pingajuata tungaanut unitsillakkarneqarnera. Nuummi tunillatsittoqarsimasoq paasineqarmat Covid-19-ip tuniluunnissaa pakkersimaarniarlugu illoqarfik apriilip arfineq-pingajuata tungaanut matoqqavoq. Taamaammat Royal Greenlandip qullersaqarfiani sulisut arlallit suliatik angerlarsimaffimminni suliaraat. Nuummi tunisassiorfik sapinngisaq naapertorlugu tunisassiuinnarpoq, soorlu tunisassiorfiit tunitsiviillu sinerissamiittut 36-jusut aamma tunisassiuinnartut. Aalisartut aalisariutillu suli tunisisinnaasut suliffeqarfiup kilisaataataani aqqaniliusunit arfineq pingasut raajarniarlutillu saarullinniarput.


Sulisut pineqartut aalisartullu inuiaqatigiinni aningaasaqarnermut ilapittuutaagamik pingaarutilittut inissisimapput. Kaaviaartitsipput.


- Sulisutsialannik meeqqat atuarfii matuneqaraluartut ernumassuteqaraluarlutillu suliinnartunik sulisoqarpugut. Tunisassiornerup sapinngisamik ingerlaannarnissaa nunatta aningaasaqarneranut pingaaruteqarluinnarpoq, Attaveqatigiinnermut Sulisoqarnermullu pisortaq Jens K. Lyberth oqarpoq.

Nersortariaqarpoq

Jens K. Lyberth Royal Greenlandimi sillimaniarnermut ataatsimiititaliani siulittaasutut oqartussaniit oqaloqateqartarlunilu suliffeqarfiup upalungaarsimaneq pillugu suleqatigiisitai ataatsimeeqatigisarlugit ulapippoq. Taamaalilluni ullut tamaasa suliffeqarfiup aqutsisuaniit nalunaarutinik apuutitsiffigineqarlunilu Royal Greenlandip Covid-19-imut tunngatillugu periusissai pillugit sianerfissamut pilersinneqarsimasumut sianertut apeqqutaat akisarpai. Paasissutissiingaatsiarnissarlu pisariaqarsimavoq.

- Suleqaterpassuagut Covid-19-imut tunngatillugu ernumassuteqarmata paasisinnaalluarpakka. Taannami massakkut tamatta, paasinartumik, ukkataraarput. Nunarpassuit ataasiakkaarlutik matorarput. Virusi nunatsinnut annguppoq. Taamaammat piffissami unammillernartumi qanoq periuseqassanerluta oqartussat innersuussutaat suliffeqarfitsinnillu ilitsersuutit pillugit paasissutissarpassuarnik nassiussuussinikuuvugut. Paasissutissiisarnitta amerlanerit sulinissaannut kajumitsilersimassagaat neriuutigaarput. Suleqatitta suliffimmi tunillanneqarnissamut illersorneqarluarnissaat pingaaruteqarpoq – aamma suliffiup avataani, Jens K. Lyberth oqarpoq.


Aalisakkerinerup nersorneqarnissaa Royal Greenlandimut pingaaruteqarpoq. Piffissami matumani pisariaqarpoq.


- Aalisarnermik inuuniuteqarneq avammut niuernikkut nunatsinni aningaasaqartitsigami pinngitsoorneqarsinnaanngilaq. Inuussutissanik tunisassiortutut avammut niueruteqarnikkut nunatta aningaasaqarneranut tunngavileeqataagatta pinngitsoorneqarsinnaannginnera aamma akisussaaffiliivoq. Taamaammat sulisorpassuit nunarput pillugu sulinerat erseqqissassallugu pissusissamisoorpoq. Piffissami ilungersunartumi suliinnarnissartik siunniusimavaat, Jens K. Lyberth oqarpoq.


Royal Greenlandip pisortaanera Mikael Thinghuus suliffeqarfiup ingerlatiinnarnissaata pingaaruteqarnera pillugu sapaatip-akunnerani kingullermi sulisunut aamma nalunaaruteqarpoq.


- Royal Greenland suliaqarfittut illersussavarput. Siunissami suliaqarfiusinnaanissaa illersorlugulu inuiaqatigiit sullitagut illersussavagut. Nunatsinniinnaq ullormut, ukiumut ulluni 365-ini, 6 millioner koruuninik inuiaqatigiinnut tapersiisarnerput immitsinnut eqqaasitsissutigisassavarput, taama Mikael Thinghuus ilaatigut sulisunut allappoq.


Covid-19-ip ilungersortitsinerata kingunerisaanik Royal Greenlandip aningaasaqarnera qanoq ikkumaarnersoq siulittuutigissallugu siusippallaarpoq. Royal Greenlandili sukaterisoq suliffeqarfiillu allarpassuit assigalugit tunisassiorneq allanngortinngikkaluarlugu aningaasartuutinik annikillisaasoq pisortaqatigiit nalunaarput.


- Tunisassiornerup ingerlatiinnarnissaa sulisutsinnut nalunaarutigissallugu pingaaruteqarpoq –tunisassiorfinni nunamiittuni aamma aalisariutaatitsinni. Sapinngisarput tamaat tunisassiorneq ingerlatiinnarlugulu tunisassianik pitsaasunik immitsinnut pilersorlutalu nunarsuarmioqativut pilersorpavut, Jens K. Lyberth naggasiivoq.

Asseq

 
 

Royal Greenland aperiguk

i
Write the text from the image