- Nunatta kitaata imartaani sinerissap qanittuani saarullittassat pingajorarterutaat 2020-mi oktobarip aallaqqaataani saarullittut uumatitatut tuninieqarsimapput, Royal Greenlandimi ingerlatsinermut aqutsisoq Sten Sørensen oqaluttuarpoq.

Aalisarfiit amerlineqarneri tunisisoqarnerulernermut ilaatigut pissutaapput. Aalisartulli saarullinnik uumatitanik tunisinermikkut isertitaqarnerupput.

- Aalisartut Maniitsumeersut Kangaatsiameersullu ukiuni kingullerni saarullinnik uumatitanik aalisarnermi amerligaluttuinnarput. Nuup Paamiullu eqqaani aalisartoqarsinnaalersillugu kingorna aalisarfiit annertusineqarput. Taamaalilluni saarullinnik uumatitanik tunisisarnermik suliniuteqarneq avannaani Qeqertarsuup eqqaaniit kujataani Paamiunut isorartussuseqarpoq, Sten Sørensen oqarpoq, nangipporlu:

- Saarullinnik uumatitanik tigooqqaanerup qaffannera saarullinnik tunisassiornerup pitsaassusaanik qaffatsitsingaatsiarpoq. Taamaalilluni akit pitsaanerusut pissarsiarineqarlutillu tunisat amerlipput. Ukioq manna Covid-19-imik tuniluuttoqartillugu ingammik saarullinnik uumasunik tunisinermi akigitinneqartup nikisinnagu taamatiinnarsimanera aalisartumut iluaqutaasoq erserpoq. Pitsaassusaa pingaarnertut peqqutaavoq, kisiannili aamma aalisakkat uumatitat amerlarnersaasa nerpiliarineqartarneri. Nerpinnik niueruteqarneq aalisakkanik ilivitsunik tunisassiareqqitassanik niueruteqarnermut sanilliullugu ingerlalluarpoq, Sten Sørensen oqarpoq.

Royal Greenland-ip 2019-imi sinerissap qanittuani saarullittassiissutaani saarulliit uumatitat tuninineqartut 20 procentit ataappaat, ukioq mannali 35 procentit missiliorpaat.

Pitsaassuseq qaffasinnerusoq

Aalisarfinni nutaani aalisarneq ingerlalluarpoq, kisiannili tunisassiorfimmi Maniitsumiittumi tunisassiorneq unammillernartoqarsimavoq.

- Maanna uagut tulaassuisullu periuseq ilikkarparput, taamaammat aalisarneq ajornartorsiuteqarnani ingerlasimasoq isumaqarpunga. Tunisassiorfimmili sulsoqarniarneq unammillernartoqarpoq, Sten Sørensen oqarpoq, nangipporlu:

- Tunisassiorfimmi Maniitsumiittumi sulisoqarluarpugut, tunisassiornermili malinnaasinnaajumalluta sulisut paarlagiiaattunngortikkusukkaluarpagut. Taamaammat kilisaataaterput Sisimiut Nuup kangerluanukarluni tunisassiassanik 700 tonsinik oqimaassusilinnik juulimi aallersinnaasimammat kilisaammilu nerpinnik tunisassiorsinnaasimammat qujanarpoq.

Saarullinnik uumatitanik aalisarlunilu tunisassiorneq ukioq manna suli uninngilaq, novembarilli aallartinnerani unissaaq.

Royal Greenlandip saarullinnik uumatitanik tunisassiornermik suliaqarneq siunissami ingerlatiinnarusuppaa.

- Bundgarnersorluni saarullittat saarullinnik tunisassiani nunarsuarmi pitsaanerpaasinnaasut paasigatsigut suliniut siunissami ingerlatiinnarsinnaassallugu neriuutigaarput. Taamaammat suliniutip ukiuni tulliuttuni ingerlatiinnarnissaa nunattalu kitaata imartaani tamarmi aalisakkanik uumatitanik aalisarnissaq pilersaarutigaarput, Sten Sørensen oqarpoq.

Inga Egede

ineg@royalgreenland.com

Assit: RG

Asseq

 
 

Royal Greenland aperiguk

i
Write the text from the image