- Maskiina saattuanik toqutsissut ikkutitipparput. Saattuanik tunisassiornermi suleqatitsinnut oqilisaataavoq. Maskiinap toqutsissutip ungasissoq isigalugu tunisassiorsinnaanerput qaffassassavaa, Royal Greenlandip Paamiuni tunisassiorfianik aqutsisoq Jan Jørgensen oqarpoq.

Maskiinamik toqutsissutip saattuanik tunisassiornermi assammik sulineq ilungersunartoq oqilsassavaa.

- Saattuat assammik toqunnisaat salinnissaallu suliaavoq ilungersunartoq. Paffimmut, pernermut tuimullu ilungersunartuuvoq. Manna tikillugu suleqatitta saattuat saviminermut anaarlullugit toquttarmatigit, kingornatigullu saattuat ataasiakkaarlugit kumigummik salittarmatigit maskiinap toqutsissutip suleqatitta sulinerminni atugaannik oqilisaatissavai, Jan Jørgensen oqarpoq.

Canadami atorneqarpoq

Maskiinat toqutsissutit Royal Greenlandip Canadami tunisassiorfiini atorneqarput, taakkunanillu ilisimasanik paarlaateqatigiinneq tunngavigalugu Royal Greenland aalajangerpoq maskiinat taakku Kalaallit Nunaannut eqqunniarlugit. Tunisassiorfinni allani marlunni, Sisimiuni aamma Qeqertarsuarmi maskiinat toqutsissutit ikkunneqarnissaat pilersaarutaavoq.

- Royal Greenlandip maskiinamik toqutsissummik aningaasaliiniarluni aalajangernera nuannaarutigaarput. Suleqatitta sulinerannik oqilisaataavoq, ilutigalugulu naammassinnissinnaanerput allanngussanngilaq. Piffissap ingerlanerani – maskiina ilikkarluarutsigu atornissaalu sungiusimalerlugu – saattuanik tunisassiornermi sulisut ikilisissinnaavavut, Jan Jørgensen oqarpoq.

Paamiuni tunisassiorfik massakkut saattuat saniatigut aamma qaleralinnik tunisassiortarpoq. Tunisassiorfik katillugit 65 -it aamma 70-it akornanni sulisoqarpoq.

Royal Greenlandip Paamiuni tunisassiorfianut pujortuleerarsuit arfinillit saattuanik tunisisarput. Pujortuleerarsuit taakku ingerlatsivimmi Kujataani saattuarniartaraluarput ingerlatsivimmi Paamiut/Nuuk-mi saattuarniartaqqilernissamik tungaanut, taannalu ulloq 25. septembari 2020 ammarpoq.

Allattoq: Inga Egede, ineg@royalgreenland.com

Assiliisoq: Jan Jørgensen

Asseq

 
 

Royal Greenland aperiguk

i
Write the text from the image