- Sangusaarluni sisorarnermi nunarsuarmi pissartanngorniunnermut anngutissaguma angusarissaarnerpaallu 40-t akornaniissaguma 2022-mi Beijingimi Kinamiittumi OL-ertoqarnerani peqataanissamut anngunnissannut periarfissaqalissaanga. Cortinami nunarsuarmi pissartanngorniunnissamut peqataanissannut qilanaaqaanga, 24–nik ukiulik Nuunu Chemnitz Berthelsen Italiami nunarsuarmi pissartanngorniuunnissamut peqataajartorluni aallanngitsiarnerani oqaloqatigigatsigu taama oqarpoq.

Nuunu Chemnitz Berthelsen meeraallunili sisorartalersimasoq inuusuttuaraallunili nunanut allanut unammisartunngorpoq. Ullumikkut Trysilimi Norgemiittumi najugaqarpoq, ulluinnarnilu sisorarnermik aallussinermi saniatigut atuarfimmi Norgemiittumi ullup ilaa Aningaasaqarneq aamma Aqutsineq pillugu ilisimatusarpoq.

Royal Greenlandimiit tapiissutisivoq

Nuunu Chemnitz Berthelsen Royal Greenlandimit aningaasanik 100.000 koruuninik annertussusilinnik tapiissutisivoq. Tapiissutit ukiuni marlunni atuutissapput. Nuunu taamaalilluni 2021-mi 50.000 koruuninik tunineqariarluni 2022-mi aamma 50.000 koruuninik tunineqaqqissaaq.

- Sisorartartutut inuunera nuannareqaara, nunanilu tamalaani nunarput sinnerlugu peqataasinnaagama assut nuannaarutigisarpara. Taamaammat Royal Greenlandimiit tapersersorneqarnera qujamasuutigeqaara. Aasakkut sulingaatsiartarama tapiissutit aningaasaqarninnut oqilisaataapput, sungiusarnissaralu aallussinnaanngorpara. Tapiissutit atorlugit timersuut aalluttuarsinnaallugulu nunarput sinnerlugu 2021-mi VM-ertoqarnerani immaqalu 2022-mi OL-ertoqarnerani peqataasinnaavunga, Nuunu Chemnitz Berthelsen oqarpoq, nangipporlu:

- Italiami ulluni makkunani VM-ertoqarnerani ingerlalluaruma Beijingimi Kinamiittumi OL-ertoqarnissaanut anngussinnaanissannut periarfissaqalissaanga. Taamaammat italiami VM-ertoqarnerani angusarissaarnerpaat 40-it akornaniinnissara neriuutigaara. Kingullermik 2019-imi Sverigemi nunarsuarmi pissartanngorniunnermut peqataagama normu 36-ullunga inissippunga. Taamaammat periarfissaqarluarpunga. Kisiannili sisorarfik, aput silalu angusannut aalajangiisuunerpaasarput.

Ulluinnaat

Nuunu Chemnitz Berthelsen seeqqumigut ajoqusersimanini pissutigalugu piffissami sivisuumi sisorarsinnaanikuusimanngilaq, sisorarsinnaaleqqipporli. Nuunu nunarsuarmi pissartanngorniunnissamut sungiusarniarluni 2020-mi oktobarimili Trysilimi najugaqarpoq. Inuusuttut nunanut allanut unammisartut allat arfineq-marluk Norgemeersut Sverigemeersullu sungiusaqatigisartakkani illorujussuarmi najugaqatigai.

- Ulluinnarput assigiiaartorujussuuvoq. Ullaarnganiit akunnerit marluk pingasulluunniit sungiusariarluta timigissartarfimmi nukkassartarpugut. Sukkallutalu sangulluarsinnaaniassagatta sisoraatigut ullut tamaasa aamma pujassartarpagut. Unnuit sapaatillu-akunneranut ullut sunngiffigisartakkakka marluk ilisimatusarlunga atortarpakka, sisorartartoq anguniagalik, seeqquminik ajoqusernini Covid –19-ilu pissutigalugit sungiusariarluni angalasinnaasimanngitsoq oqaluttuarpoq.

- Covid-19-ip nunarsuaq tamakkerlugu tuniluunnera pinngikkallarmat assersuutigalugu Italiami sikumut iigartartulimmut aasakkut sungiusariarlungalu nunanut allanut unammiartorlunga angalangaatsiartarpunga. Taamaammat Italiami nunarsuarmi pissartanngorniunnissamut peqataaniarlunga angalanissannut qilanaartupilussuuvunga.

Angajuni nuannaartoraa

Nuunu angajoqarpoq, Niviaq Chemnitz Berthelsen, ujakkaarluni nunanut allanut unammisartuunikumik. Niviaq Norgemi najugaqarpoq, taamatuttaaq aqqaluaat aamma Norgemi najugaqarluni.

- Meeraasunga angajora Norgemi sisoraatigaluni ilinniarnertuunngorniarpoq. Nuummut angerlaraangami ullut tamaasa sungiusartarpoq. Nuannaartoreqaara, taamaammat sungiusaraangat ilagisarpara. Angajuma angajoqqaamalu pissuserissaarnissamut, kiisalu nunanut allanut unammisartuussaguma pinngitsoorsinnaanngisannik aallussisinnaanissannut kajumissaartarpaannga.

Nuunu 2017-imi nunarsuarmi pissartanngorniuunnermut peqataanikuuvoq, nunarsuarmilu sisorallaqqinnerpaanngornissani allanit tamanit angorusunnerpaavaa.

- Nunanut allanut unammisartutut angusarissaarniaraanni aallussillunilu piumassuseqartariaqarpoq. Sisorarneq nuannaralugulu inuuniutigigakku soorunami sangusaarluni sisorarnermi angusarissaarnissara sinnattoriuaannarpara, tassa sangusaarluni unamminermi nunarsuami pissartanngornissaaq, Nuunu Chemnitz Berthelsen oqarpoq.

Nuunu ajunnginnerpaamik kissaallugulu aqagu nunarsuarmi pissartanngorniunnissaani angusarissaarnissaanik kissaapparput.

Allattoq: Inga Egede, ineg@royalgreenland.com

Assiliisoq: Jonas Anderson & nammineq assilisat

Asseq

 
 

Royal Greenland aperiguk

i
Write the text from the image