- European Cup Østrigimi ingerlanneqartoq angusarissaarlunga peqataaffigisinnaagakku nuannaarutigeqalugulu eqqissiallassutigeqaara. 2022-mi OL-eqarnissaat anngunnissannut periarfissagissaarnissannut qulakkeerinninneruvoq, Nuunu Chemnitz Berthelsen oqarpoq.

Nuannaarlunilu eqqissiallappoq

Nuunu 2022-mi OL-ertoqarnissaanut anngutissaguni sisorarfimmi matumani tullianilu European Cup-ini imaluunniit World Cup-ini tallimani aammalu VM-imi peqataasariaqarpoq, pointinnanniarlunilu sisunerit marluk angusarissaarluni naammassisariaqarpai. Nuunu februaarimi Italiami VM-ertoqarmat aappassaani sisunermi taamaatiinnartariaqarimanini pissutigalugu pointinnanngitsoorpoq. Sapaatip-akunnerali kingulleq Østrigimi European Cupertoqarnerani pointinnakkami maanna unammineq ataasiinnaq angusarissaarfigalugu peqataaffigissallugu amigaatigiinnalerlugulu 2022-mi OL-ertoqarnissaanut anngunnissamut piumasaqaatit eqquutsinniarlugit FIS naapertorlugu sisorarnermut peqataasariaqarpoq.

- OL-ertoqarnissaanut anngutissaguma sisorarfimmi matumani tullianiluunniit sisorarnerni unatut ittuni tallimaasuni marluk pointinnaffigisariaqarpakka. Maanna pointinnannanga VM-imut peqataallungalu European Cup-imi pointinnallunga peqataavunga, Nuunu oqaluttuarpoq, nangipporlu:

- Sisorarfimmi matumani piumasaqaat ataaseq iluatsikkakku nuannaaqalungalu eqqissiallaqaanga. Isumakuluutissaaruppunga, sisorarfiullu tulliani unamminerit marluk pointinnanniarlunga peqataaffigisariaaruppakka. Maanna 2022-mi OL-ertoqarnissaanut piumasaqaatit angusinnaallugit paasivara, Nuunu oqarpoq.

FIS naapertorlugu sisorarneq

Nuunu OL-imut anngunniarluni unammisaqattaarnermi matumani European Cup-inut World Cup-inulluunniit pingasunut peqataassaaq, minnerpaamillu unamminermi ataatsimi pointinnattariaqarpoq. Tamatuma saniatigut OL-imut anngunniarluni piumasaqaatinik eqquutsitsiniarluni FIS naapertorlugu unamminernut arlalinnut peqataassaaq. FIS naapertorlugu unamminerit tassaapput pisortatigoortumik unamminerit nunat tamalaat sisorarnermut kattuffiannit aaqqissuunneqartut.

Nuunu, ulluinnarni Norgemi najugaqarlunilu sungiusartartoq, 2021-mi februaarimi VM-imut peqataanermi kingornali European Cup-inut FIS-ilu naapertorlugu unamminernut peqataaniarluni Europami angalasimasoq, maanna Tysklandimiippoq.

- Piffissami kingullermi Italiami, Østrigimi, Sloveniami maannalu Tysklandimi FIS naapertorlugu unamminernut arlalinnut peqataavunga. Unammisaqattaarnerit ukioq manna apriilimi unikkallartinnagit FIS naapertorlugu unamminernut sapinngisamik amerlanerpaanut peqataanissara massakkumiit pilersaarutaavoq. Sverigemukarlunga unammisaqattaarnerit naammassissagunarpakka, Nuunu oqarpoq, nangipporlu:

- Unammisaqattaarnernut arlalinnut peqataaqqittalernera Covid-19-illu tuniluunnerata nalaani sisorarnermik nuannarilluinnakkannik aallussisinnaanissannut periarfissaqarnera qujamasuutigaara, Nuunu Chemnitz Berthelsen oqarpoq.

Royal Greenlandip Nuunu Chemnitz Berthelsen 100.000 koruuninik, 2021-mi 2022-milu tunniunneqartussanik, tapiissuteqarfiginikuuaa.

Allattoq: Inga Egede, ineg@royalgreenland.com

Assi: Nammineq pigisaq

Asseq

 
 

Royal Greenland aperiguk

i
Write the text from the image