- Tunisassiorfik nutaaq decemberip aallaqqaataani 2020 tunisassiorsinnaanissaminut piareerpoq, silali unerisimanikuunngimmat aatsaallu massakkut sikummat ippassaq aalisartut siullermeerlutik tunisimmata, ullumi tunisassiorluta aallartippugut. Ullumikkut tunisassioqqaarnitsinni sulisut nutaat 15-it siullermeerlutik sulipput, taama oqarpoq Arctic Fish Greenland A/S-imi pisortaq, Frederik Olsen.

Nuussuarmi Arctic Fish Greenland A/S-ip tunisassiorfittaava 700 kvadrat miiterinik angissuseqartoq 500 tonsinik qerititsivimmiittuuteqarsinnaavoq qalerallillu niaquikkat paperuikkallu 12 tonsit 16 tonsillu missingi ullormut tunisassiarisinnaallugit.

Ukioq naallugu tunisisinnaalerput

Siornatigut Nuussuarmi tunisassiorfiusimasumi qaleralinnik qerisunik 130 tonsinik annertussusilinnik uningasuuteqarsinnaanikuummat quersuit qeritsiviutigisut ulikaaraangata tunisineq unittarpoq. Tunitsiviusimasumi aalisakkanik tunisassiortoqarani qerititerinerinnaq ingerlanneqarnikuummat sulisut ikitsuinnaat sulisorineqarnikuupput.

Tunisassiorfiulli nutaap ammarneratigut maanna nunaqarfimmi aalisartut 40-it 45-illu akornanniittut maanna ukioq naallugu nunaqarfimminni tunisisinnaalerput. Sapaatit akunnerni aggersuni Nuussuarmi aalisarneq ingerlallualeriarpat tunisassiorfik paarlagaallutik sulisunik sulisoqalerpat sulisut 30-it sulisorineqarsinnaalissapput.

- Ukiuni arlaqalersuni nunaqarfimmi innuttaasut Arctic Fish Greenland A/S-ip tunisassiorfittaavata atuutilernissaa eriniginikuuaat, aamma maanna ammarnera nunaqarfimmi innuttasunut pingaaruteqaqaaq. Taamaattumik maanna tunisassiorfik ammarmat nuanaqarfimmiut nuannaarlutillu naammagisimaarinnipput, Frederik Olsen oqarpoq.

Aalisartitseqatigiiffik Arctic Fish Greenland A/S Nuussuarmi aamma Kullorsuarmi aalisartut, kiisalu Royal Greenland A/S-ip piginneqatigiiffigisaat 2017-imi pilersinneqareermat Nuussuarmi tunisassiorfimmik nutaamik pilersitsinissaq 2018-imi aalajangiunneqarpoq.

Nuussuaq 181-inik innuttaqarpoq.

Allattoq: Inga Egede, ineg@royalgreenland.com

Assiliisoq: Frederik Olsen

Asseq

 
 

Royal Greenland aperiguk

i
Write the text from the image